„პფაიზერი“ ვახტანგურად - ბოჭორიშვილის კლინიკის დირექტორი და მისი მეგობარი ბუსტერ დოზით აიცრნენ

„დღეს ფაიზერით ავიცერი, მესამე, ე.წ. ბუსტერ დოზით. ვისარგებლე რა ბოროტად კოვიდთან ომის ფლაგმანთან, დავით გადელიასთან მეგობრობით, სწორედ იგია ჩემი მეწყვილე ამ აცრაში“.

ბოჭორიშვილის კლინიკის დირექტორი დავით გადელია და პოეტი კობა ჭუმბურიძე ბუსტერ დოზით აიცრნენ.

„ვახტანგური“, ასე ასათაურებს პოეტი ფოტოს, რომელსაც თავის ფეისბუკგვერდზე აქვეყნებს.

„ვახტანგური
გადმოცემის თანახმად ამ ტრადიციას გორგასლის დროს დაედო სათავე, როცა ვახტანგმა გაქრისტიანებულ ხევისბერთან ერთად ამგვარად შესვა ღვინო.

შემდეგ იმას ვიტყვი, რომ ვიდრე ედუარდ ჯენერი ყვავილის აცრას დააპატენტებდა, ეს აცრა იოჰან გულდენშტადტმა აღწერა დაახლოებით 15 წლით ადრე სამეცნიერო ჟურნალში. მან ეს მეთოდი ჩაიწერა სამხრეთ საქართველოში, ადუაშვილებისა და ხარისჭირაშვილებისაგან.

ანუ, ვახტანგურიც ჩვენია და აცრაც.
ხოლო ამ ორი ძველი ტრადიციის შეჯვარებით მივიღებთ ვახტანგურად აცრას.

დედამიწა ძალიან დაპატარავდა და ხალხი ძალიან მოძრავი გახდა. შესაბამისად, მერმისაც შეიძლება მოხდეს კოვიდპანდემიის მსგავსი რამ და რაც მეტ გამოცდილებას დავაგროვებთ ახლა, მით უფრო ნაკლები დანაკარგით გადავლახავთ შემდგომს.

დღეს ფაიზერით ავიცერი, მესამე, ე.წ. ბუსტერ დოზით. ვისარგებლე რა ბოროტად კოვიდთან ომის ფლაგმანთან, დავით გადელიასთან მეგობრობით, სწორედ იგია ჩემი მეწყვილე ამ აცრაში.

თუ რამდენიმე მოყოყმანეს ეს სახალისო ფოტო აცრას გადააწყვეტინებს, დათოც და მეც უბედნიერესი ხალხი ვიქნებით.

მეორე წელია დათო ფრონტის წინა ხაზზეა. წარმოდგენაც კი მზარავს, რას გაუძლო ამ ხნის განმავლობაში და წინ კიდევ რა ჯოჯოხეთი ელის.

კიდევ ერთხელ ვეფერები მედიცინის ყველა მუშაკს, ვინც ასეთი ამაგი დასდო ჩვენს თაობას, ხშირად საკუთარი სიცოცხლის ფასად. ნეტავ თუ მოვესწრები იმას, როცა მათ ამ ღვაწლის მეათედი მაინც დაუფასდებათ.“ - დაწერა პოეტმა სოციალურ ქსელში.

აგრეთვე დაგაინტერესებთ:

🔵 გიორგი ფხაკაძე კორონავირუსის სამხრეთ აფრიკულ შტამთან დაკავშირებით დამატებითი ინფორმაციას ავრცელებს

🔵 სამხრეთ აფრიკაში აღმოჩენილი კორონავირუსის ახალი შტამი ისრაელშიც გამოვლინდა