პროკურორი: სააკაშვილის გარემოცვის კომფორტისთვის ბიუჯეტიდან 9 მილიონი ლარი დაიხარჯა

„მიხეილ სააკაშვილის ოჯახის წევრების, მისი სამეგობრო წრის და გარემოცვის კომფორტისთვის ბიუჯეტიდან 9 მილიონი ლარი დაიხარჯა“, -  ამის შესახებ გიორგი მუჯირმა განაცხადა, რომელიც დიდი ოდენობით საბიუჯეტო თანხის გაფლანგვაში ბრალდებულების, მიხეილ სააკაშვილისა და თეიმურაზ ჯანაშიას საქმის პროკურორია.

მუჯირის თქმით, ბრალდება პრეზიდენტის, მისი სამეგობროს და გარემოცვის კომფორტისთვის გახარჯულ თანხებს ეხება და არა ოფიციალურ ვიზიტებსა და პროტოკოლით გათვალისწინებულ ღონისძიებებში გახარჯულ თანხებს.

„დღეს, სისხლის სამართლის საქმეზე, რომელიც შეეხება პრეზიდენტისა და სახელმწიფო დაცვის სპეციალური სამსახურის ხელმძღვანელის, თეიმურაზ ჯანაშიას მიერ 9 მილიონის გაფლანგვის საქმეს, ჩატარდა სასამართლო სხდომა. მეტი სიცხადისთვის მინდა საზოგადოებას მოვახსენო სისხლის სამართლის საქმესთან დაკავშირებით, რომ მოცემული სისხლის სამართლის საქმე არ შეეხება პრეზიდენტის ოფიციალურ ვიზიტებსა და პროტოკოლით გათვალისწინებულ ღონისძიებებში გახარჯულ თანხებს. ამავე პერიოდში, პრეზიდენტის მიერ, ლეგიტიმურად, მსგავს ღონისძიებებში დახარჯული იყო 20 მილიონი ლარი, თუმცა, წარმოდგენილი 9 მილიონი ლარი, რაც წარმოადგენს ბრალდების საგანს, იყო და ემსახურებოდა პრეზიდენტის, მისი ოჯახის წევრების, მისი სამეგობრო წრის და გარემოცვის კომფორტს და რეალურად წარმოადგენდა მათი დასვენების, გართობის, თუ სხვა ხარჯებს. მათ შორის, მინდა განმარტება გავაკეთო, იყო გასახდომი, გამაჯანსაღებელი, გამაახალგაზრდავებელი პროცედურები. მინდა რამდენიმე მაგალითი მოვიყვანო, ინსბრუგში 114 000 ლარი იქნა გადახდილი მიხეილ სააკაშვილისა და გიორგი უგულავას გასახდომ პროცედურაში. ასევე, მონაკოში, ტაილანდში, სინგაპურში, მილანში და სხვადასხვა ელიტარულ კურორტებზე დასვენებისთვის იქნა თანხები გახარჯული. ასევე, მზარეულისთვის, სტილისტისთვის, მათი გარემოცვის საჩუქრებისთვის იქნა გადახდილი ეს 9 მილიონი ლარი. დაცვის მხარე ყოველთვის ცდილობდა და დღემდე ცდილობს, დააკნინოს ეს სისხლის სამართლის საქმე, თუმცა, აქ საუბარია პირადი კომფორტისთვის გახარჯულ 9 მილიონ ლარზე“, - განაცხადა მუჯირმა.

ე.წ. "პიჯაკების საქმეზე" მორიგი სასამართლო პროცესი დღეს გაიმართა.

ამავე თემაზე:

🔵"სააკაშვილს დაცვის უფლება წაართვეს, სასამართლო გაუქმებულია" - ბექა ბასილაია

🔵"პიჯაკების საქმე"-მიხეილ სააკაშვილის მორიგი სასამართლო პროცესი დღეს გაიმართება