რუსეთმა თავის ყოფილ საელჩოსთან აქციის გამო საქართველოს საპროტესტო ნოტა გამოუგზავნა

თბილისში, რუსეთის საელჩოს ყოფილი შენობისა და ამჟამინდელი სექციის წინ პარტია „ევროპული საქართველოს“ აქციის გამო, რუსეთის ფედერაციამ საქართველოს საპროტესტო ნოტა გამოუგზავნა.

ამის შესახებ რუსეთის საგარეო უწყების წარმომადგენელმა, ალექსეი ზაიცევმა განაცხადა. 

მისი თქმით, 26 იანვარს, საქართველოში შვეიცარიის კონფედერაციის საელჩოს რუსეთის ფედერაციის ინტერესების სექციის შენობის წინ ოპოზიციის აქციის დაწყებამდე ცოტა ხნით ადრე, სექციაში ელექტროენერგიის ძირითადი და სარეზერვო ელექტრომომარაგების წყაროები გაითიშა.

რუსულმა მხარემ საქართველოს ხელისუფლებას დიპლომატიური ურთიერთობების შესახებ ვენის კონვენციის დაცვისკენ მოუწოდა.

„ველით, რომ საქართველოს ხელისუფლება მიიღებს ყველა ზომას მსგავსი ინციდენტების თავიდან ასაცილებლად“, – განაცხადა ზაიცევმა.

„ევროპული საქართველოს“ ორგანიზებით უკრაინის მხარდამჭერი აქცია 26 იანვარს, საღამოს გაიმართა. რუსეთის საელჩოს ყოფილ შენობაზე უკრაინის დროშა წარწერით „დიდება უკრაინას“, ასევე, ნატოს დროშა ფრიალებდა პრორექტორის საშუალებით.

"რუსეთის საგარეო საქმეთა სამინისტრო, რომელიც პრაქტიკულად ყოველთვის მხარს უჭერს ყველა საერთაშორისო დოკუმენტის დარღვევას, ფეხქვეშ გათელვას, ახლა საუბრობს იმაზე, რომ თურმე საელჩოს ყოფილ შენობაში შუქი ჩაქრა.

ჯერ ერთი, ჩვენ არც გვინახავს, ჩაქრა თუ არა. თავადაც მარტივად ჩააქრობდნენ და ამას გამოიყენებდნენ საპასუხოდ.ეს აჩვენებს დღევანდელი რუსული ხელისუფლების პოლიტიკის სახეს.

მეორე, კიდევ უფრო მნიშვნელოვანი საკითხი არის ის, რომ უკრაინასთან დაკავშირებით საქართველოს ხელისუფლების უმოქმედობის და აბსოლუტურად მიუღებელი სიჩუმის ფონზე, საზოგადოებრივი პროტესტი, პოლიტიკური პოზიციონირება, რაც „ევროპულმა საქართველომ“ გააკეთა, არის სწორი, მართალი და საჭირო პოზიცია. რუსეთის რეაქციაც ამაზე მიუთითებს“, – ასე გამოეხმაურა „ევროპული საქართველოს“ წევრი, გიგი წერეთელი რუსეთის ხელისუფლების განცხადებას.

სხვა სიახლეები:

🔲 ნაზარბაევი ყაზახეთის მმართველი პარტიის თავმჯდომარის თანამდებობიდან გადადგა

🔲 Reuters: რუსეთს უკრაინის საზღვართან სისხლის მარაგი ჩააქვს

🔲 "პატარას მკურნალობა დააფინანსა კაცმა, რომელიც აგერ უკვე 7 თვეა ჩვენს გვერდით აღარ არის" - გიგა მაქარაშვილის ემოციური პოსტი

🔲 შევა თუ არა "ნაცმოძრაობა" პარლამენტში ორშაბათს გახდება ცნობილი