შალვა პაპუაშვილი საფრანგეთის, გერმანიისა და დიდი ბრიტანეთის ელჩების ერთობლივ სტატიაზე: გუშინ მგონი სიმართლის ელექსირი ჰქონდა მიღებული რამდენიმე ელჩს. იმდენი სიმართლე ილაპარაკეს, რაც ოთხი წელია არასდროს უთქვამთ

აშკარა გახდა, რომ მთელი ეს ოთხი წელი, მიზეზი რატომაც ევროკავშირი და დასავლეთი გვერჩოდა, იყო ის, რომ არ დავყევით მთავარ მოთხოვნას და არ წავედით ესკალაციაზე რუსეთთან, - განუცხადა პარლამენტის თავმჯდომარემ შალვა პაპუაშვილმა ჟურნალისტებს.

პაპუაშვილს კითხვა დაუსვეს რუსეთ-უკრაინის ომის მეოთხე წლისთავზე საფრანგეთის, გერმანიისა და დიდი ბრიტანეთის ელჩების ერთობლივ სტატიასთან დაკავშირებით.

„გუშინ მგონი სიმართლის ელექსირი ჰქონდა მიღებული რამდენიმე ელჩს. იმდენი სიმართლე ილაპარაკეს, რაც ოთხი წელია არასდროს უთქვამთ. ფაქტობრივად ამხილეს ყველაფერი, რაზეც ჩვენ ვსაუბრობდით. აშკარა გახდა, რომ მთელი ეს ოთხი წელი, მიზეზი რატომაც ევროკავშირი და დასავლეთი გვერჩოდა, იყო ის, რომ არ დავყევით მთავარ მოთხოვნას და არ წავედით ესკალაციაზე რუსეთთან. აბა რა არის, თუ არა „მეორე ფრონტის“ გახსნის მოთხოვნა, როდესაც საქართველოს ეუბნები რომ დაუწესოს სანქციები რუსეთს, ტურისტები არ შემოუშვას, როგორც ევროკავშირის ელჩმა გვითხრა, ვაჭრობა არ გვქონდეს, ანუ ღვინო არ გაიტანოს ქართველმა გლეხმა, ფრენები უნდა ჩავკეტოთ და არ ვიცი ეს თვითმფრინავები ციდან უნდა მოვხსნათ, თუ რა უნდა ვქნათ?! ბენზინი თურმე არ უნდა შემოიტანოს ბიზნესმენმა რუსეთიდან და იყიდოს ძვირი, ბრიტანული ბენზინი, როგორც ეს გვითხრა ბრიტანეთის ელჩმა. ეს ყველაფერი ნიშნავს საქართველოს ჩათრევას რუსეთთან ესკალაციაში, ომს, ისეთ ომს, სადაც არც ბრიტანელი, არც ფრანგი და არავინ საერთოდ, ერთი ჯარისკაცი არ ჩამოვა ჩვენთან საომრად. შეგვატოვებენ მარტო როგორც ყოველთვის გვიწევდა და შემოგვხედავენ გარედან“, - აღნიშნა პაპუაშვილმა.

გერმანიის, საფრანგეთის და დიდი ბრიტანეთის ელჩები დეზინფორმაციას ავრცელებენ, თითქოს საქართველო რუსეთის სანქციების გვერდის ავლაში ეხმარება. მოწოდებები იყო დიპლომატების დღევანდელ შეხვედრაზეც, სადაც მათთვის არასასურველი მედიასაშუალება „იმედი“ არ მიიწვიეს. კიდევ ერთი ტყუილია ის, რომ საქართველოს ომში ჩართვისკენ არავინ მოუწოდებდა.