სოზარ სუბარი: საქართველოში არჩევნები ჩატარდება ძალიან მაღალ დონეზე, ორგანიზებულად, გამარჯვება გარანტირებულია და არც არის სხვა მოლოდინი - ვერანაირი გადატრიალება ვერ მოხდება, რადგან ხელისუფლება არის საკმარისად ძლიერი

 საქართველოში არჩევნები ჩატარდება ძალიან მაღალ დონეზე, ორგანიზებულად, გამარჯვება გარანტირებულია და არც არის სხვა მოლოდინი, - განაცხადა გადაცემაში „იმედი LIVE“ პარლამენტის ვიცე-სპიკერმა სოზარ სუბარმა.

„რაც შეეხება გადატრიალებას, ვერანაირი გადატრიალება ვერ მოხდება და არ მოხდება, რადგან ხელისუფლება არის საკმარისად ძლიერი, საზოგადოების დიდი ნაწილი არის ერთ აზრზე, რომ არ უნდა დავუშვათ ჩვენს ქვეყანაში არეულობა, რადგან ამ არეულობის შედეგი იქნება ომი და უბედურება, ქვეყნის დანგრევა და ჩვენ ასეთი არაერთხელ გამოვცადეთ. ეს მწარე გამოცდილებაა, რომელიც უბიძგებს ქართველ ხალხს, რომ მოახდინოს კონსოლიდაცია იმ ძალის ირგვლივ, რომელიც იცავს ქვეყანაში მშვიდობას.

როცა ექსცესების მოსურნე არის ძალიან ბევრი, როგორც ქვეყნის შიგნით, ისე განსაკუთრებით ქვეყნის გარეთ, ბუნებრივია ამის მცდელობები იქნება, მაგრამ დღეს ჩვენს ქვეყანას აქვს საკმარისი ძალა იმისთვის, რომ აღკვეთოს ნებისმიერი მსგავსი გამოვლინება. ეს ძალიან კარგად იციან ამ ექსტრემისტული ოპოზიციის წარმომადგენლებმაც, ამიტომაც ისწრაფვიან ციხისკენ, რომ თავიანთ დაპირებებს გაექცნენ.

ერთია, რომ მათ არ შეუძლიათ გადატრიალების მოწყობა, მაგრამ მათ შეუძლიათ ექსცესების მოწყობა, რასაც შეიძლება მოჰყვეს ნგრევა, რაც ვნახეთ ბოლო პერიოდში“, - აღნიშნა სოზარ სუბარმა.