თენგიზ შარმანაშვილი: არ შეიძლება, ახალგაზრდებს დანაშაულისკენ უბიძგო და შემდეგ შორიდან უყურო, მათ როგორ გაასამართლებენ, არ მგონია, სააკაშვილს რამე პასუხისმგებლობა ჰქონდეს

„სახელმწიფო ნებისმიერ შეკრებას შეუწყობს ხელს, რომელიც კანონის ფარგლებს არ გასცდება, მაგრამ სახელმწიფო დაწესებულებებში შევადნას, ბოლოკირებას ან სხვა ძალადობრივ აქციებს თუ დაიწყებენ, ეს ადამიანები პასუხს აგებენ“, – ამის შესახებ საპარლამენტო უმრავლესობის წევრმა, თენგიზ შარმანაშვილმა განაცხადა.

შარმანაშვილს კითხვა დაუსვეს საქართველოს ყოფილი პრეზიდენტის მიხეილ სააკაშვილის ფეიქბუქპოსტზე, სადაც ის წერს: „მრავალრიცხოვანმა საპროტესტო მსვლელობამ მაინც დამიტოვა უკმარისობის განცდა, არ გაეცა პასუხი მთავარ კითხვას, რა არის შემდეგი ნაბიჯები, ვეძებთ რევოლუციური ჯავშანმანქანის ინჟინრებს“.

შარმანაშვილის თქმით, სააკაშვილის მხრიდან რევოლუციაზე საუბარი არარელევანტურია.

„ამ ხალხს თუ უნდა ძალადობისკენ უბიძგოს, ეს უკვე ბევრჯერ გააკეთა და რით დამთავრდა, ყველამ კარგად იცის. რა რევოლუციურ სცენარზეა საუბარი? სახელმწიფო ნებისმიერ შეკრებას შეუწყობს ხელს, რომელიც კანონის ფარგლებს არ გასცდება, მაგრამ სახელმწიფო დაწესებულებებში შევადნას, ბოლოკირებას ან სხვა ძალადობრივ აქციებს თუ დაიწყებენ, რა თმა უნდა, ეს ადამიანები პასუხს აგებენ. არ შეიძლება, ახალგაზრდებს დანაშაულისკენ უბიძგო და შემდეგ შორიდან უყურო, მათ როგორ გაასამართლებენ. არ მგონია, სააკაშვილს რამე პასუხისმგებლობა ჰქონდეს. ეს არის დეზორგანიზებული მასა, რომელიც ვერც რევოლუციას მოახდენს და ვერც არჩევნებს მოიგებს. სააკაშვილის მხრიდან რევოლუციაზე საუბარი არარელევანტურია. ქართველი ხალხის და იმ კრიტიკული მასის მხარდაჭერა ვერ ექნება, რომელსაც შეუძლია, საქართველოში პოლიტიკური სურათი ძალადობრივად შეცვალოს. ქათველი ხალხი აღარ დაუშვებს ძალადობრივად ხელისუფლების ცვლას, რადგან ამან შეიძლება, კატასტროფულ შედეგებამდე მიიყვანოს საქართველო“, – განაცხადა შარმანაშვილმა.