"ვლოცულობთ ტრაგედიის მსხვერპლთა მარადიული განსვენებისთვის" - რომის პაპის სამოციქულო ნუნციატურა საქართველოში, სამძიმრის წერილს ავრცელებს

რომის პაპის სამოციქულო ნუნციატურა საქართველოში, ბათუმის ტრაგედიასთან დაკავშირებით სამძიმრის წერილს ავრცელებს.

ე.წ. ვატიკანის საელჩომ, რომელიც თბილისში მდებარეობს, სამძიმრის წერილი "ტვიტერში" გამოაქვეყნა.

"რომის პაპის, ფრანცისკეს სამოციქულო ნუნციატურა საქართველოში, მთელ ქვეყანას უერთდება ლოცვაში ბათუმის ტრაგედიის მსხვერპლთა მარადიული განსვენებისთვის და ასევე, ლოცულობს გადარჩენილებისთვის, რათა ჰპოვონ ნუგეში თავიანთ რწმენაში. მადლიერებას გამოვხატავთ ყველა დამხმარეს მიმართ", - აღნიშნულია სამძიმრის წერილში.

ბათუმში, 26 მაისის ქუჩაზე, საცხოვრებელი კორპუსის სადარბაზო 8 ოქტომბერს, დაახლოებით, 12:00 საათზე ჩამოინგრა. შინაგან საქმეთა სამინისტრომ ბათუმში საცხოვრებელი კორპუსის ნგრევის ფაქტზე მიმდინარე გამოძიების ფარგლებში სამი პირი დააკავა.

ბათუმში მომხდარ ტრაგედიას სულ 9 ადამიანის სიცოცხლე ემსხვერპლა, მათ შორის სამი მცირეწლოვანია.

ნგრევას ერთადერთი ცოცხლად გადარჩენილი პირი კლინიკაში რჩება, 36 წლის კაცი კონტაქტურია. ექიმების შეფასებით მისი მდგომარეობა მძიმე, თუმცა სტაბილური.

პრემიერ-მინისტრ ირაკლი ღარიბაშვილის ინიციატივით, დაღუპულთა ხსოვნის პატივსაცემად, ორშაბათი, 11 ოქტომბერი გლოვის დღედ გამოცხადდა.

ამავე თემაზე:

საგარეო უწყება, ბათუმის ტრაგედიასთან დაკავშირებით საერთაშორისო საზოგადოებას, თანაგრძნობისთის მადლობას უხდის