"იტალიური ამბები - ნეტა მარტო ამ მონსტრის ჩაცმულობა იყოს ყველაზე დიდი პრობლემა მსოფლიოში..." - მარი მახარაძე

იტალიაში მცხოვრები ქართველი ემიგრანტი მარი ნანა მახარაძე ვლადიმერ პუტინის ცნობილი, იტალიური ქურთუკის შესახებ ატეხილ აურზაურს ეხმარება:

"იტალიური ამბები...
მთელი მსოფლიოს ყურადღება მიმართულია დღეს უკრაინის ომისკენ...
მთელ მსოფლიოს ერთი ანტიგმირი ჰყავს...
ომგამოვლილი ქვეყნები გაჭრილ ხორცზე მარილმოყრილივით გრძნობენ ამ ტკივილს და  საშინელებას. 
ნებიერა ევროპისთვის ეს მაინც შორიდან დანახული ომია, ისინი ბევრ ისეთ დეტალებს უღრმავდებიან, რაც ჩვენთვის შეიძლება უმნიშვნელოც იყოს, თუმცა შეტორტმანება იგრძნობა...

მოსკოვში, ლუჟნიკებზე რუსეთის პრეზიდენტის იტალიური ბრენდის Loro Piana-ს ქურთუკში გამოჩენამ, რომელიც მილიონახევარი რუბლი ღირს, რაც 12000 ევროს ეკვივალენტია, იტალიელების აღშფოთება გამოიწვია და უამრავი კითხვა გააჩინა. Lvmh ჯგუფი, რომელსაც Loro Piana ეკუთვნის, განმარტავს, რომ ქურთუკი 2013 წლის კოლექციიდან არის და რომ ომის დაწყებისთანავე შეწყვიტა ყველანაირი ბიზნესურთიერთობა  რუსეთის სახელმწიფოსთან. ეს კი ნათელი მაგალითია იმისა, თუ ვის მხარეს ვდგავართ. ევროპელებისთვის, განსაკუთრებით იტალიელებისთვის, ჩაცმულობას, თუ აქსესუარებს, ძალიან დიდი მნიშვნელობა აქვს. მათ აქვთ თანდაყოლილი ნიჭი, ისე მოირგონ ყველაზე იაფფასიანი ტანსაცმელი, რომ ბრენდული გეგონოთ.

პიერ ლუიჯი ლორო პიანა აღნიშნავს: ,,ჩვენ ვაკვირდებით დღეს უკრაინის პრეზიდენტის ჩაცმულობას, ხაკისფერი მაისური და ქურთუკი - ის ისეთივე ახლოა მასასთან, როგორც თავად პრეზიდენტი, ამიტომაც აჯობებს დავფიქრდეთ რა უფრო მნიშვნელოვანია ყველასთვის - სიმდიდრე, თუ საკუთარი ხალხის სიყვარული?!"

თითქოს არაფერი, მაგრამ ბიზნესსა და მოდაშიც, ომის მოგების ყველას საკუთარი ტაქტიკა აქვს. დღეს ყველაზე დიდი ანტირეკლამაა, რაც რუსეთს და მის პრეზიდენტს  უკავშირდება... და მაინც... ნეტა მარტო ამ მონსტრის ჩაცმულობა იყოს ყველაზე დიდი პრობლემა მსოფლიოში...

#შეცვალეპრიორიტეტები #რუსეთიოკუპანტია," - წერს მახარაძე