“ვთვლი, რომ კატასტროფულად იქცევა საქართველო - მთავრობაც და ხალხიც, მაგრამ მაინც მიყვარს” - ზურა პირველი

პოლონეთში მოღვაწე ქართველი მსახიობი და ჟურნალისტი ზურა პირველი, სოციალურ ქსელ ფეისბუკზე წერს, თუ რატომ უყვარს საქართველო და ქართველები, მიუხედავად უამრავი ნაკლის და და შეცდომისა, მაგრამ ამავე დროს ხსნის, რომ მიუხედავად ამისა, არ ერიდება კრიტიკას, როდესაც ამის მიზეზს ხედავს:

"ძალიან სამწუხაროა, რომ ამის დაწერა მიწევს:

როგორ ავადაც არ უნდა ვიყოთ, როგორც არ უნდა გადავგვარდეთ, მე საქართველო და ქართველები ყველა ქვეყანას და ყველა ერს მირჩევნია!
არ ვამბობ, რომ ყველაზე უკეთესია, მე მიყვარს ყველაზე მეტად!
ამის მიზეზი უმარტივესია - მე ქართველი ვარ!

მაგრამ რადგან მე ქართველი ვარ, ეს არ ნიშნავს, რომ ვერ დავინახო, რომ ავად ვართ, რომ ამორალურები გავხდით, რომ სქელკანიანები და ყალბები გავხდით, რომ ძალიან დავპატარავდით...

ბევრად უფრო მტკივნეულია ჩემთვის ქართველების ცუდად მოქცევა, ვიდრე სხვა რომელიმე ერის... უფრო სწორედ, სულაც არ არის მტკივნეული სხვა ერის ცუდად მოქცევა: დამწყდება გული და გამივლის მალე.

ეგვიპტეში მინდოდა წასვლა - მიყვარს ეგვიპტეში ყოფნა. გავიგე, რომ თურმე ეგვიპტე პუტინს უჭერს მხარს და ძალიან მარტივად გადავიფიქრე იქ წასვლა - სულ ეს არის ჩემი განცდა სხვა ერებთან დაკავშირებით.

აღფრთოვანებული ვარ უკრაინელებით, გაოგნებული, აღტაცებული და შეყვარებული ვარ მათზე... მაგრამ არც მომსვლია აზრად, ნეტა უკრაინელი ვიყო მეთქი - რა სისულელეა?!

ვთვლი, რომ კატასტროფულად იქცევა საქართველო: ხალხიც და მთავრობაც, მაგრამ მიყვარს ისევე, როგორც მიყვარდა და ამას ვერაფერი ვერ შეცვლის!

ვისაც ეს არ გესმით, შემიძლია მხოლოდ ვუთანაგრძნო თქვენს ფანატიზმს!