მსროლელთა 7 ლიცენზია ევროპული თამაშებისთვის

პოლონეთში გასამართ III ევროპულ თამაშებზე საქართველოს სროლის სახეობათა ნაკრები 7 სპორტსმენით იქნება წარმოდგენილი.

ახლახან დასრულებულ შესარჩევ ეტაპზე ლიცენზიები მოიპოვეს ტყვიის სროლაში: ნინო სალუქვაძემ, ლიზი კილაძემ, მარიამ ფროდიაშვილმა, ლევან ქადაგიძემ, კაკო მოსულიშვილმა და ცოტნე მაჭავარიანმა, ხოლო სასტენდო სროლაში: იაროსლავ სტარცევმა.

25-მეტრ დისტანციაზე სპორტული 5.66 მმ პისტოლეტიდან სროლაში ნინო სალუქვაძე იასპარეზებს.

10 მეტრიან დისტანციაზე პნევმატური პისტოლეტით სროლაში პირად პირველობაში ლიზი კილაძე და მარიამ ფროდიაშვილი გამოვლენ, ხოლო გუნდურში მათ ნინო სალუქვაძე დაემატება.

ვაჟებში პირად პირველობაში ლევან ქადაგიძე და კაკო მოსულიშვილი მოსინჯავენ მიზანს, ხოლო გუნდურში ცოტნე მაჭავარიანი შეუერთდებათ.

შერეულ წყვილებში ორი გუნდი გვეყოლება- კილაძე-მოსულიშვილი და ფროდიაშვილი-ქადაგიძე.

სასტენდო სროლაში იაროსლავ სტარცევი მრგვალ სტენდზე ისვრის.

III ევროპული თამაშები 21 ივნისს გაიხსნება და მას პოლონეთის ქალაქები კრაკოვი-მალოპოლსკის სავოევოდო უმასპინძლებს. თამაშების პროგრამაში შესულია: სროლა(ტყვია, სასტენდო), მშვილდოსნობა, სინქრონული ცურვა, ბადმინტონი, 3×3 კალათბურთი, პლაჟის ხელბურთი, კაიაკი და კანოე, ველოსპორტი, ფარიკაობა, ტანვარჯიში, ძიუდო, კარატე, თანამედროვე ხუთჭიდი, სამთო რბენა, 7-კაცა რაგბი, ხელოვნურსაფარიან ტრამპლინიდან ხტომა, მეკლდეურობა, მაგიდის ჩოგბურთი, ტრიატლონი, ფრენბურთი (კლასიკურიც და პლაჟის), ჭიდაობა, ძალოსნობა და ბრეიქდანსი.

თამაშები სპორტის მთელ რიგ სახეობებში ევროპის ჩემპიონატთანაა გათანაბრებული, ზოგში კი პარიზის 2024 წლის ოლიმპიადის სალიცენზიო ტურნირია და პირდაპირ იძლევა ოლიმპიურ ლიცენზიებს.

წყარო: საქართველოს სროლის ეროვნული ფედერაცია.