"Москва" ჩაიძირა - სარაკეტო კრეისერი სწორედ იქ წავიდა, სადაც კუნძულ ზმეინის მესაზღვრეებმა გაუშვეს

რუსეთის თავდაცვის სამინისტრო ადასტურებს, რომ შავი ზღვის ფლაგმანი, სარაკეტო კრეისერი "Москва" ჩაიძირა.
ინფორმაციას ამის შესახებ რუსული საინფორმაციო სააგენტო რია ნოვოსტი ავრცელებს.
სააგენტო, რუსეთის თავდაცვის სამინისტროზე დაყრდნობით წერს, რომ კრეისერი ბუქსირებისას, შავ ზღვაზე ძლიერი შტორმის გამო ჩაიძირა.
"კრეისერმა МОСКВА-მ პორტში ბუქსირებისას საბრძოლო მასალის აფეთქების შედეგად მიღებული კორპუსის დაზიანების გამო სტაბილურობა დაკარგა. შტორმის დროს ზღვის ღელვის გამო კრეისერი ჩაიძირა". - ნათქვამია თავდაცვის სამჯნისტროს განცხადებაში.

უკრაინის პრეზიდენტის ოფისის ხელმძღვანელის მრჩევლმა, ოლექსი არესტოვიჩმა დღეს, 14 აპრილს გაავრცელა ინფორმაცია, რომ МОСКВА ჩაიძირა, თუმცა რუსეთი ამტკიცებდა, რომ კრეისერი ცურვას განაგრძობდა. ინფორმაცია, რომ გემზე აფეთქება მოხდა, თუმცა ის არ ჩაძირულა, გაავრცელა პენტაგონმაც.

13 აპრილს რუსეთის შეიარაღებული ძალების კრეისერ МОСКВА -ს ნეპტუნის ტიპის რაკეტები მოარტყეს. ინფორმაცია უკრაინულ მედიას ოდესის საოლქო სამხედრო ადმინისტრაციის მეთაურმა, მაკსიმ მარჩენკომ მიაწოდა. ასევე, მისი თქმით, ეს ის გემია, რომელიც კუნძული ზმეინის მცველებმა ცნობილი მიმართულებით გაუშვეს.

"დამტკიცდა, რომ სარაკეტო კრეისერი МОСКВА დღეს სწორედ იქ წავიდა, სადაც კუნძული ზმეინის ჩვენმა მესაზღვრეებმა გაუშვეს!". – თქვა მარჩენკომ.