„რა უნდა გაეკეთებინა და რისი გაკეთება შეეძლო თავისუფალი სამყაროს ლიდერს“ - რას წერს ექიმი ზურა გურული?

უკრაინაში რუსეთის შეჭრაზე, ამერიკაში მოღვაწე ქართველი ექიმი, ზურა გურული სოციალურ ქსელში ვრცელ მოსაზრებას აქვეყნებს:

„რა უნდა გაეკეთებინა და რისი გაკეთება შეეძლო თავისუფალი სამყაროს ლიდერს და რატომ არის აღშფოთებული უკრაინის პრეზიდენტი და ყველა წესიერი ადამიანი მთელ მსოფლიოში.

დაზვერვის მონაცემების დაზუსტებისთანავე მოკავშირეებთან ერთად უნდა მოეწვია პრესკონფერენცია და პირდაპირ მიემართა პუტინისათვის:

ჩვენ, თავისუფალი სამყაროს ლიდერები, ვფლობთ უტყუარ ინფორმაციას, რომ რუსეთი ამზადებს სისხლიან, სასტიკ, დაუნდობელ სამხედრო ოპერაციას მთელ უკრაინაზე და მისი ჯარების სამიზნე იქნება უზარმაზარი ქალაქები, დიდი ურბანული ცენტრები. 21-ე საუკუნეში, ევროპის შუაგულში ჩვენ ვერ დავუშვებთ პრეცედენტის შექმნას, რომ უდანაშაულო ქვეყანა, უდანაშაულო, უმწეო ადამიანები, ქალები და ბავშვები განადგურდნენ ბომბებით. განადგურდნენ იმიტომ, რომ მათი მეზობელი ქვეყნის ლიდერს ეს ტერიტორია სჭირდება ბუფერულ ზონად განვითარებულ, დემოკრატიულ ევროპასთან.

ეს არის წინასწარ გამოცხადებული სამხედრო დანაშაულის ჩადენის მცდელობა, რასაც ჩვენ ვერ და არ დავუშვებთ.

დღეიდან ვიწყებთ უმკაცრეს ეკონომიკურ სანქციებს რუსეთის წინააღმდეგ და ნატო-ს შეიარაღებული ძალების საჰაერო თავდაცვის სისტემები მთლიანად გადაფარავენ უკრაინული მეგაპოლისების ცას.

ეს ოპერაცია იქნება მხოლოდ თავდაცვითი, სამოქალაქო მოსახლეობაში მსხვერპლის თავიდან ასაცილებლად. ნატო-ს შეიარაღებული ძალები დაიწყებენ სამხედრო წვრთვნებს უკრაინულ არმიასთან ერთად, რომელიც გაგრძელდება მანამ, სანამ არ დასრულდება რუსულ-ბელორუსული მანევრები. ნებისმიერი მცდელობა სამხედრო დანაშაულის ჩადენისა, აღიკვეთება დაუნდობლად.

ჩვენ, თავისუფალი სამყაროს ლიდერები, ვხელმძღვანელობთ რა ბუდაპეშტის ხელშეკრულებით, საერთაშორისო სამართლის შესაბამისად ვართ ვალდებულნი დავიცვათ ქვეყანა, რომელსაც დავათმობინეთ ბირთვული იარაღი და გარანტორად დავდექით მისი საზღვრების უსაფრთხოებისათვის.

ჩვენი გადაწყვეტილება ურყევია და ვიმოქმედებთ ყოველგვარი ყოყმანის გარეშე.

ჩვენ არ გვსურს ომი და ბოლო წამამდე ღიად დავტოვებთ დიპლომატიურ არხებს კონფლიქტის მშვიდობიანად მოსაგვარებლად.

ჩვენკენ არის სიმართლე და საერთაშორისო სამართალი.

შეუძლებელი იყო? არანაირად.“ - წერს ზურაბ გურული.

ასევე საინტერესოა:

🔵 „ნებისმიერი, მშვიდობისმოყვარე ადამიანის სიცოცხლის უფლება თანაბრად იყოს დაცული ამ პლანეტაზე“ - ექიმი ნანა გეგეჭკორი

🔵 „ბრავო, "ოცნება" გასაგებია, რომ ომში არ უნდა შევვარდეთ, ერთ ლუკმად არ ვეყოფით, მაგრამ ასე ჩირგვებში ჯდომა სირცხვილია“ - ექიმი ქეთი ლობჟანიძე