რამდენნი არიან ისინი, ვინც კლავს, აუპატიურებს და ძარცვავს უკრაინელებს? - თამარა ეიდელმანი

ისტორიკოსი თამარა ეიდელმანი, რუსი ოკუპანტების მიერ განადგურებულ ქალაქ ბუჩაზე, ემოციურ ბლოგს აქვეყნებს:

"როდესაც 1945 წლის აპრილში ბრიტანელი და კანადელი სამხედროები სიკვდილის ბანაკ ბერგენ-ბელზენს მიუახლოვდნენ, იმ ბანაკს, სადაც რამდენიმე თვით ადრე ანა ფრანკი დაიღუპა - ჯარისკაცები ნანახით იმდენად შოკირებულები იყვნენ, რომ ზედამხედველებს ცეცხლი გაუხსნეს. მსგავს ფაქტებს ადგილი ჰქონდა სხვა გათავისუფლებულ ბანაკებშიც. იმ დროს ზოგადად არსებობდნენ ადამიანები, რომლებსაც მიაჩნდათ, რომ აუცილებელი იყო SS-ის ყველა წევრის განადგურება, მეტიც, ნაცისტური პარტიის ყველა წევრის განადგურებაც კი.

ნაცისტური არაადამიანურობის სიმბოლოდ იქცა ილზა კოჰი, რომელიც პატიმრების კანისაგან აბაჟურებს ამზადებდა.

ცხადია, რომ ნორმალური ადამიანი ასე არ მოიქცევა. ილზა კოხი შეურაცხადად არ მიიჩნიეს - ის გაასამართლეს და ორჯერაც კი. პირველად, ბრალის დასადგენად მტკიცებულებები საკმარისი არ აღმოჩნდა, მაგრამ 1949 წელს დაახლოებით 200-მა ადამიანმა დაადასტურა ის, თუ რას სჩადიოდა იგი ბუჰენვალდში. 1951 წელს ილზა კოხს სამუდამო პატიმრობა მიუსაჯეს.

ილზა და კარლ კოხის ვაჟმა ომის შემდეგ თავი მოიკლა, ვერ გაუძლო რა საშინელებას და სირცხვილს. მეორე ვაჟი, რომელიც ქალმა ციხეში უცნობი კაცისაგან გააჩინა, დედას ჩამოართვეს. მოზარდი 19 წლის იყო, როდესაც ნამდვილი დედის ვინაობა შეიტყო და მას რეგულარულად ხვდებოდა. 1967 წელს ილზა კოხმა თავი ჩამოიხრჩო საკანში - მოგვიანებით შვილი ცდილობდა დაემტკიცებინა, რომ დედა არ იყო ისეთი ურჩხული, როგორადაც მას მთელი სამყარო მიიჩნევდა. თუმცა, როგორც ჩანს, უშედეგოდ.

მაგრამ ხომ არსებობს მედლის მეორე მხარეც. შოკი, რომელიც ადამიანებმა განიცადეს, როდესაც შეიტყვეს ილზა კოხის და მისნაირთა შესახებ, შვებანარევი იყო. ყველაფერი ცხადი გახდა - ნაცისტურ სისასტიკეებს შეურაცხადთა, სადისტთა და გარყვნილთა ჯგუფი სჩადიოდა.

მაგრამ, საქმეც ის არის, რომ - არა.

ადამიანის კანისაგან აბაჟურებს ყოველი მეორე ნაცისტი არ აკეთებდა. ჰანა არენდტი „ბოროტების ბანალურობის“ შესახებ მსჯელობისას, ცალკე გამოყოფდა იმ ფაქტს, რომ ზონდერჯგუფებში საერთოდაც ცდილობნენ არ აეყვანათ ისინი, ვისაც მკვლელობა სიამოვნებას ანიჭებდა. ცხადი იყო, რომ ასეთი ადამიანები რთულად სამართავები იყვნენ. მონდომებულები სჭირდებოდათ. „ნორმალური ადამიანები“.

უკრაინაში რუსეთის არმიის არაადამიანური ქცევის შესახებ ცნობები, რაც ბოლო დღეებში გაჩნდა, უკვე იმდენად შემაშფოთებელია, რომ ყოველ ჯერზე ფიქრობ - უარესი რაღა უნდა მოხდეს. რა შეიძლება იყოს იმაზე უარესი, ვიდრე მარიუპოლის დაბომბილი სამშობიაროა? ვიდრე ბომბები, რომლებიც დაუშინეს შენობას, რომლის წინაც იყო წარწერა „ბავშვები“? აღმოჩნდა რომ შეიძლება და ეს არის ბუჩა... ვინ შეიძლება იყოს ამის ჩამდენი?

პირველი რაც თავში გაგიელვებს სიტყვებია - სადისტები, არანორმალურები. მაგრამ ამდენი არანორმალურიც ბევრი ხომ არ არის? რამდენნი არიან ისინი, ვინც კლავს, აუპატიურებს და ძარცვავს უკრაინელებს? და მათი ოჯახის წევრები, რომლებიც სატელეფონო საუბრების მიხედვით, სულმოუთქმელად ელიან როდის ჩავა მათთან ოქროს სამკაულების და ტელეფონების ნადავლი? ყველა მათგანი არანორმალურია?

როგორც ჩანს, ყველა ჩვენგანში ცხოვრობს პირველყოფილი მიდრეკილება ძალადობისადმი. ცივილიზაციის სიო მხოლოდ აფერხებს მის გამოვლენას, და მეტი არაფერი. სამწუხაროდ, ამ შემთხვევაში ცივილიზებულობა აღზრდას და განათლებას არ უდრის. რა შესანიშნავი იქნებოდა, უნივერსიტეტის დიპლომს ადამიანისთვის ბოროტების ჩადენა რომ აეკრძალა... მაგრამ, ცივილიზაცია ამ შემთხვევაში - რაღაც ბევრად უფრო მყიფე და რთულად შესაქმნელი - არის პატივისცემა ადამიანის სიცოცხლისადმი, ადამიანისადმი, მის ყველა გამოვლინებაში.

აი აქ კი, ძალიან გვიჭირს. და საქმე მხოლოდ პუტინსა და მის პროპაგანდაში არ არის. ოჯახური ძალადობა - ცხოვრების ნორმაა. აგრესიულობა და პიროვნების დათრგუნვა ყველა საგანმანათლებლო დაწესებულებაში - ბაგა-ბაღებიდან უნივერსიტეტებამდე - ჩვეულებრივი ამბავია. განუკითხაობა და ჩაგვრა ჯარში. პრივატულობის არარსებობა ყველა სიტუაციაში. ძალის კულტი. საზოგადოების და კულტურის მილიტარიზაცია. ჰომოფობია. ინვალიდების გარიყვა. ზიზღი მიგრანტების მიმართ... და კიდევ რამდენი რამის დამატება შეიძლება ამ სიაში?

და ეს ნოყიერი ნიადაგია, რომელიც გასმენინებს ისტორიებს რადიოაქტიური ფერფლისა და უკრაინელი ნაცისტების შესახებ, რომელიც ხელს უწყობს ყველაზე შემაძრწუნებელი და პრიმიტიული ინსტიქტების გარეთ გამოფრქვევას.

მათ, ვინც ბუჩაში დანაშაულები ჩაიდინა, გაასამართლებენ. მაგრამ არის კიდევ ერთი ამოცანა - გათავისუფლება ამ ნიადაგისაგან, აგრესიისა და სიძულვლილის იმ ატმოსფეროსაგან, რომელიც ჩვენს ქვეყანაშია გაბატონებული და მყარდება არამხოლოდ პუტინის პროპაგანდისტების ძალისხმევით, არამედ ჩვენი მცდელობებითაც.

და ბოლოს, დარწმუნებული ვარ: საბოლოოდ გაირკვევა, რომ იმათ გვერდზე, ვინც ბუჩაში ძარცვავდა და აუპატიურებდა, იყვნენ ისეთებიც, ვისაც ეს არ გაუკეთებია. ინსტინქტები, ინსტიქტებად, მაგრამ პერსონალური არჩევანი ჯერ არავის გაუუქმებია",-წერს ისტორიკოსი.

ასევე დაგაინტერე­­­­სებთ:

🔵დაღუპულია 23 მშვიდობიანი მოქალაქე - რამდენიმე საათის წინ ხარკოვი ისევ დაბომბეს

🔵20-მდე პირს შორის დაპირისპირების შედეგად, ორი ადამიანის მკვლელობისა და რამდენიმეს დაჭრის ფაქტზე, თბილისში 5 პირი დააკავეს

🔵რომის პაპი უკრაინაში ვიზიტისთვის მზადყოფნას აცხადებს