BBC: ხელისუფლებაში დაბრუნების შემდეგ პირველად თალიბებმა საჯარო სიკვდილით დასჯა მოაწყვეს

 BBC  ინფორმაციით, ავღანეთში, თალიბანის ხელისუფლებაში მოსვლის შემდეგ პირველად განხორციელდა საჯარო სიკვდილით დასჯა. 

მკვლელობისთვის გასამართლებულ კაცს მსხვერპლის მამამ სამჯერ ესროლა. როგორც თალიბანის წარმომადგენლებმა თქვეს, კაცი ფარაჰის პროვინციაში, გავსებულ სტადიონზე მოკლეს. სიკვდილით დასჯას თალიბანის ათეულობით წარმომადგენელი ესწრებოდა.

თალიბანის უზენაესმა ლიდერმა გასულ თვეში გამოსცა ბრძანება, რომლითაც მოსამართლეებს ავალდებულებს დაეკისრათ სასჯელი, რომელიც შეიძლება მოიცავდეს საჯარო სიკვდილით დასჯას, საჯარო ამპუტაციასა და ჩაქოლვას. თუმცა, ზუსტი დანაშაულები და შესაბამისი სასჯელები თალიბანის მიერ ოფიციალურად არ არის განსაზღვრული.

მიუხედავად იმისა, რომ გასულ თვეში ლოგარის პროვინციაში სავსე სტადიონის წინაშე ათეულობით ადამიანი გაროზგეს, ეს პირველი შემთხვევაა, როდესაც თალიბებმა საჯაროდ ადამიანი სიკვდილით დასაჯეს.

დაჯგუფების წარმომადგენელი ამბობს, რომ სიკვდილით დასჯას უზენაესი სასამართლოს რამდენიმე მოსამართლე, სამხედრო მოსამსახურე და მინისტრი ესწრებოდა, მათ შორის იუსტიციის, საგარეო საქმეთა და შინაგან საქმეთა მინისტრები.

თალიბანის განცხადებით, კაცი სახელად ტაჯმირი, რომელიც სიკვდილით დასაჯეს, ხუთი წლის წინ სასიკვდილოდ დაჭრა კაცი. მოგვიანებით ის სამმა თალიბმა მოსამართლემ გაასამართლა.

განაჩენის აღსრულებამდე გამოქვეყნდა ცნობა ღონისძიების გასაჯაროების შესახებ და "ყველა მოქალაქეს სთხოვდნენ შეერთებოდნენ სპორტულ მოედანზე".

მოკლულის დედა ამბობს, რომ თალიბანის ლიდერები სთხოვდნენ შეეწყალებინა ბრალდებული, მან განაჩენის აღსრულება მოითხოვა.

ასევე საინტერესოა:

🔵  „დღეს ჩემს ცხოვრებაში უდიდესი რამ მოხდა“ - რას წერს პიანისტი სანდრო გეგეჭკორი

🔵 სამი დღეა 59 წლის კაცს ეძებენ - თუ გაქვთ ინფორმაცია დაუკავშირდით ოჯახს ან პოლიციას!