დონალდ ტრამპი: ბაიდენის ადმინისტრაციას ვაქცინების შექმნასთან არაფერი აქვს საერთო

აშშ-ის ყოფილმა პრეზიდენტმა, დონალდ ტრამპმა უკმაყოფილება გამოთქვა იმის გამო, რომ ვაქცინების შექმნის საკითხში მისი ადმინისტრაციის დამსახურება საკმარისად აღიარებული არ არის.

„ვაქცინების წყალობით, რომლის შექმნაც მე და ჩემმა ადმინისტრაციამ დავაჩქარეთ, ჩვენ ახლა პირბადის ტარება აღარ გვჭირდება. ნუთუ წარმოუდგენელი არაა, რომ ჩვენს სახელს არც კი ახსენებენ? ვაქცინების გარეშე, მსოფლიო 1917 წლის „ესპანური გრიპის“ მსგავსი სიტუაციის წინაშე აღმოჩნდებოდა, როდესაც 100 მილიონამდე ადამიანი გარდაიცვალა. ვაქცინების წყალობით, რომელიც რეკორდულ დროში შევქმენით, მსგავსი რამ არც მოხდება. უბრალოდ გვახსენეთ, გთხოვთ! ბაიდენის ადმინისტრაციას ვაქცინების შექმნასთან არაფერი აქვს საერთო. მათ მხოლოდ ვაქცინების განაწილების გეგმა შეიმუშავეს, რომელიც ისედაც კარგად მუშაობდა!“ - განაცხადა დონალდ ტრამპმა.

13 მაისს აშშ-ის დაავადებათა კონტროლისა და პრევენციის ცენტრში განაცხადეს, რომ სრულად ვაქცინირებულ პირებს შეუძლიათ ცხოვრების ნორმალურ რეჟიმს დაუბრუნდნენ.

„მეცნიერება მკაფიოა ამ საკითხზე: თუ თქვენ სრულად ხართ აცრილი, თქვენ დაცული ხართ და შეგიძლიათ დაიწყოთ ისეთი საქმის გაკეთება, რისი გაკეთებაც პანდემიის გამო შეწყვიტეთ”, - განაცხადა აშშ-ის დაავადებათა კონტროლისა და პრევენციის ცენტრის ხელმძღვანელმა, როშელ ვალენსკიმ.