ფაშინიანმა უარყო ევროკავშირსა და ევრაზიულ კავშირს შორის არჩევანის საკითხზე რეფერენდუმის ჩატარების იდეა

სომხეთის პრემიერ-მინისტრმა ნიკოლ ფაშინიანმა უარყო იდეა ევროკავშირისა და ევრაზიულ კავშირს შორის რეფერენდუმის ჩატარების შესახებ. ამის შესახებ Deutche Welle იუწყება.

ფაშინიანმა ამ იდეას „ალოგიკური“ უწოდა. სომხეთის პრემიერს მიაჩნია, რომ ამ ეტაპზე საერთო-სახალხო რეფერენდუმისთვის არანაირი საფუძველი არ არსებობს.

„ჩვენ ვმუშაობთ და განვაგრძობთ ევრაზიული კავშირის ფარგლებში მუშაობას, ვიდრე ევრაზიულ კავშირსა და ევროკავშირს შორის არჩევანი გარდაუვალი იქნება“, - განაცხადა ფაშინიანმა. მისი თქმით, ამ ეტაპზე ეს არჩევანი თეორიულ ხასიათს ატარებს და თეორიული არჩევანის რეფერენდუმზე გამოტანა არ არის სწორი და გონიერი.

ფაშინიანს მიაჩნია, რომ რეფერენდუმის ჩატარება იმ დროისთვის უნდა გადაიდოს, ვიდრე სომხეთი ევროკავშირში გაწევრიანების საკითხზე ოფიციალურ განაცხადს არ შეიტანს. „მანამდე კი სომხეთი იმუშავებს მშვიდად, მშვიდობიანად, ნერვიულობის გარეშე და არ იკამათებს ევრაზიული ეკონომიკური კავშირის შესახებ“, - განაცხადა ნიკოლ ფაშინიანმა.

ფაშინიანმა ასე უპასუხა ევრაზიული ეკონომიკური კავშირის ქვეყნების ლიდერთა მოწოდებას, რომ სომხეთმა ევროკავშირში შესაძლო გაწევრიანების საკითხზე რეფერენდუმი ჩაატაროს. ევრაზიული კავშირის ლიდერებმა ფაშინიანისგან მოითხოვეს, რომ ამ ორგანიზაციას და ევროკავშირს შორის არჩევანი გააკეთოს.