ილჰამ ალიევი: აზერბაიჯანი არ მონაწილეობდა და არ მიიღებს მონაწილეობას ირანის წინააღმდეგ ოპერაციებში. ეს არის ჩვენი პოზიცია

აზერბაიჯანი არ მონაწილეობდა და არ მიიღებს მონაწილეობას ირანის წინააღმდეგ მიმდინარე ოპერაციებში. BBC-ის ინფორმაციით, ამის შესახებ აზერბაიჯანის პრეზიდენტმა ილჰამ ალიევმა ნახიჩევანის ავტონომიურ რესპუბლიკაში დრონებით განხორციელებული თავდასხმის გამო გამართულ უშიშროების საბჭოს სხდომაზე განაცხადა.

მისი თქმით, დღეს ირანის მხრიდან აზერბაიჯანის ტერიტორიაზე განხორციელდა ტერორისტული აქტი. ირანის სახელმწიფომ ნახიჩევანის ავტონომიური რესპუბლიკის ტერიტორია უპილოტო საფრენი აპარატების გამოყენებით დაბომბა. აზერბაიჯანი არც ადრე მონაწილეობდა და არც ახლა მიიღებს მონაწილეობას ირანის წინააღმდეგ ოპერაციებში. ეს არის ჩვენი პოზიცია“, - აღნიშნა ალიევმა.

აზერბაიჯანის პრეზიდენტმა ირანს მოსთხოვა განმარტებები, ბოდიშის მოხდა და ასევე იმ პირების სისხლისსამართლებრივი პასუხისმგებლობის დაკისრება, რომლებიც თავდასხმაზე არიან პასუხისმგებელი.

როგორც ცნობილია, ირანის სახელმწიფო მედიამ განაცხადა, რომ ირანი ამ თავდასხმასთან კავშირში არ არის. აზერბაიჯანის საგარეო საქმეთა სამინისტროს განცხადებით კი, დაახლოებით შუადღისას ორი დრონი დაესხა თავს ნახიჩევანის ავტონომიური რესპუბლიკას. ერთი უპილოტო აპარატი აეროპორტის ტერმინალის შენობას დაეცა, ხოლო მეორე - სკოლის შენობის მახლობლად სოფელ შეკერაბადში ჩამოვარდა.