მარმარილოს ზღვიდან 3, 539 კუბური მეტრი ლორწო ამოიღეს

თურქეთში მარმარილოს ზღვის ლორწოსგან აქტიური გაწმენდა გრძელდება. ამ დროისთვის უკვე 3,539 კუბური მეტრი ლორწო შეგროვდა, - ინფორმაციას ქვეყნის გარემოს დაცვისა და ურბანიზაციის მინისტრი, მურატ ქურუმის ავრცელებს.

”მარმარილოს ზღვის გაწმენდის მეცხრე დღეს 3,539,9 კუბური მეტრი ლორწო ამოიღეს”, - განაცხადა მინისტრმა.

მარმარილოს ზღვის გაწმენდა 208 რეგიონში გრძელდება.

ცნობისთვის, სტამბოლის სიახლოვეს, მარმარილოს ზღვის წყლები ბუნებრივი წარმოშობის ლორწოთი დაიფარა. გასულ კვირას, თურქული პრესა ყურადღებას ამახვილებდა იმ ეკოლოგიურ კატასტროფაზე, რომელიც მარმარილოს ზღვაში ხდება, საქმე ეხება ფიტოპლანქტონის არნახულ გამრავლებას, რასაც ხელს უწყობს სამრეწველო ნარჩენები და მომწამვლელი, მავნე ნივთიერებები, რომლებიც მარმარილოს ზღვაში ჩაედინება.

თურქეთის პრეზიდენტმა ეკოლოგიური კატასტროფის თავიდან აცილება ბრძანა. ერდოღანის მითითებით, ზღვის დაბინძურების მიზეზების შესასწავლად სპეციალური კომისია შეიქმნება.

ფიტოპლანქტონი ზღვის ზედაპირზე და წყალქვეშ რუხი-მოთეთრო ლორწოს სახით არსებობს,  რომელიც ხელს უშლის წყალში ჟანგბადის შეღწევას და შესაბამისად, ყოველივე ცოცხალ არსებას დაღუპვით ემუქრება.

ამავე თემაზე: 

"მარმარილოს ზღვაში კატასტროფა ხდება, რომელიც შეიძლება შავ ზღვასაც დაემართოს"