ნიდერლანდების ელჩი უკრაინაში მყოფ თანამემამულეებს მოუწოდებს, რომ ქვეყანა დაუყოვნებლივ დატოვონ

"ნიდერლანდების მოქალაქეები, რომლებიც ამჟამად უკრაინაში იმყოფებიან, ქვეყანა დაუყოვნებლივ უნდა დატოვონ", - ამის შესახებ უკრაინაში ნიდერლანდების ელჩმა, იენეს დე მოლმა განაცხადა.

მისივე თქმით, შესაბამისი ინსტრუქციები საელჩომ ჰააგიდან მიიღო.

ელჩის თქმით, სიტუაცია არაპროგნოზირებადია და ჰოლანდიელებმა უნდა ჰკითხონ საკუთარ თავს, რამდენად არის მათი დარჩენა ნამდვილად საჭირო.

ელჩის განცხადებით, საუბარია არა ევაკუაციაზე, არამედ თავისუფალ არჩევანზე ქვეყნის დატოვების შესახებ უსაფრთხოების საკითხებიდან გამომდინარე.

დე მოლი ხაზს უსვამს, თუ რამდენად რთულია საელჩოსთვის ჰოლანდიელების ადეკვატური დახმარება:

„თუ დარჩენას გადაწყვეტთ, ეს თქვენი პასუხისმგებლობაა.

გთხოვთ გაითვალისწინოთ, რომ ჩვენთვის ძნელია დაგეხმაროთ სათანადოდ, თუ პრობლემები შეგექმნათ.

მინდა ყველას ვუთხრა: ნუ მიიღებთ ზედმეტ რისკს და დროულად მიიღეთ გადაწყვეტილება",- განაცხადა დე მოლმა.

ელჩი ამბობს, რომ მას კარგად შეუძლია წარმოიდგინოს, რომ წასვლა არ არის ადვილი გადაწყვეტილება, მაგრამ აღნიშნავს, რომ ვინც გადაწყვეტს დარჩენას, კარგად უნდა მოემზადოს:

„ახალი ამბების თვალყურის დევნით კარგად იყავით ინფორმირებული იმის შესახებ, თუ რა ხდება.

მართალი გითხრათ, ჩვენ, როგორც საელჩო, იმაზე მეტად არ შეგვიძლია ვიწინასწარმეტყველოთ რა მოხდება, ვიდრე თქვენ.

სამწუხაროდ, ჩვენ არ გვაქვს ბროლის ბურთი", - დასძინა მან.

სხვა სიახლეები:

🔳 "ტყისკენ წამათრია, დავჭერი დანით, საწოლზე მიმაბა… მეუბნებოდა, ფული სად არისო" - რას ჰყვება 16 წლის გოგო, რომელსაც დედ-მამა მოუკლეს?

🔳 ქუთაისში ტურისტი სცემეს და ტელეფონი წაართვეს - დაზარალებული კლინიკაშია გადაყვანილი

🔳 ე.წ. ქოლ-ცენტრების საქმეზე სახელმწიფო უსაფრთხოების სამსახური განცხადებას ავრცელებს - „სიცრუეზე აგებული კამპანია“