ორბანი: უნგრეთსა და რუსეთს შორის ყოველთვის უნდა არსებობდეს რაღაც, ამას შეიძლება უკრაინაც კი ეწოდოს

უნგრეთი დაინტერესებულია უკრაინის შენარჩუნებით, რადგან უნგრელებისთვის მნიშვნელოვანია, რომ რუსეთსა და უნგრეთს შორის „ყოველთვის იყოს რაღაც“. ამის შესახებ უნგრეთის პრემიერ-მინისტრმა ვიქტორ ორბანმა პარლამენტში სიტყვით გამოსვლისას განაცხადა.

მისი თქმით, როდესაც უნგრეთი საბჭოთა კავშირის მეზობელი იყო, ეს მისთვის მომგებიანი არ იყო.

„ამიტომ ჩვენ დაინტერესებულნი ვართ არა უკრაინის დასუსტებით, არამედ მისი გაძლიერებით. რუსეთსა და უნგრეთს შორის ყოველთვის უნდა არსებობდეს რაღაც — მას შეიძლება უკრაინაც კი ეწოდოს. ჩვენ მსოფლიოს არა უკრაინული, არამედ უნგრული პერსპექტივიდან ვუყურებთ და უნგრელების უსაფრთხოება უფრო დიდი წარმატებით შეიძლება იყოს გარანტირებული, თუ ჩვენ რუსეთის მეზობლები არ ვიქნებით“, - განაცხადა ორბანმა.

მან დასძინა, რომ სწორედ ამიტომ, „უკრაინას ყოველთვის შეუძლია, უნგრეთის მხარდაჭერის იმედი ჰქონდეს“.

„ერთადერთი კითხვა ისმის, როგორ წარმოგვიდგენია უკრაინის ადგილი ამ ევროპაში? ჩვენ არ გვინდა მათი ევროკავშირში შეშვება; ისინი ისე იქცევიან, თითქოს უკვე წევრები არიან. ისინი მოთხოვნებს აყენებენ, იმუქრებიან და გვაშანტაჟებენ, მიუხედავად იმისა, რომ წევრებიც კი არ არიან. ჩვენ არ გვინდა ასეთი ადამიანების, ან ასეთი ქვეყნის ხილვა კავშირში, მაგრამ ვეცდებით, ევროკავშირსა და უკრაინას შორის სტრატეგიული შეთანხმება დავდოთ, რომელიც უკრაინის მომავალს ევროპისთვის და ჩვენთვის, უნგრელებისთვის, სასარგებლო გზით გადაწყვეტს“, - აღნიშნა უნგრეთის პრემიერ-მინისტრმა.