POLITICO: ევროპარლამენტში ევროპის სახალხო პარტიის ფრაქციის გავლენიანი გერმანელი წევრის, ანგელიკა ნიბლერის წინააღმდეგ თაღლითობის ბრალდებით გამოძიება დაიწყო

 ევროპარლამენტში გერმანიის გავლენიანი მემარჯვენე-ცენტრისტული დელეგაციის ხელმძღვანელის, ანგელიკა ნიბლერის წინააღმდეგ ევროკავშირის სახსრების არამიზნობრივად გამოყენების ბრალდებით გამოძიება მიმდინარეობს. ინფორმაციას ამის შესახებ გამოცემა POLITICO ავრცელებს.

ევროპარლამენტის იურიდიულ საკითხთა კომიტეტი დაიწყებს განხილვას, უნდა მოეხსნას თუ არა საპარლამენტო იმუნიტეტი ნიბლერს - „ევროპის სახალხო პარტიის“ წევრს - ევროპის საჯარო პროკურატურის სამსახურის მოთხოვნის შემდეგ.

ამას მოჰყვება კომიტეტის მოსმენა ნიბლერის მონაწილეობით და საბოლოო გადაწყვეტილება რამდენიმე თვის განმავლობაში არ არის მოსალოდნელი.

ევროპარლამენტის ორი ოფიციალური პირის თქმით, ევროპის საჯარო პროკურატურის სამსახური ნიბლერს ბრალს სდებს იმაში, რომ მან თანაშემწეები მძღოლებად დაიქირავა, რათა ის მშობლიური მიუნხენიდან ბრიუსელსა და სტრასბურგში ეტარებინათ - ასევე პირადი და საქმიანი შეხვედრებისთვის, რომლებიც არ უკავშირდებოდა მის საქმიანობას ევროპარლამენტის დეპუტატის რანგში.

ევროპარლამენტის წესების თანახმად, თანაშემწეებს მხოლოდ საპარლამენტო მოვალეობების შესრულებაში შეუძლიათ დახმარება.

„ეს ბრალდებები უსაფუძვლოა. მსურს, რომ საქმის ფაქტები მაქსიმალურად სწრაფად და სრულად გაირკვეს“, - განუცხადა ნიბლერმა POLITICO-ს.