რუსეთში „ექსტრემისტული LGBT“-ს წევრობისთვის სამ პირს პატიმრობა მიუსაჯეს

რუსეთის ქალაქ ორენბურგში ერთ-ერთი ბარის სამ თანამშრომელს პატიმრობა მიუსაჯეს „ექსტრემისტული LGBT“-ს წევრობისთვის. ამის შესახებ Deutche Welle იუწყება.

ბარის ყოფილ არტ-დირექტორს, ალექსანდრე კლიმოვს ორი წელი და სამი თვე, ადმინისტრატორს დიანა კამილიანოვას 6 წელი და სამი თვე და ბარის მეპატრონეს, ვიაჩესლავ ხასანოვს შვიდწლიანი პატიმრობა მიუსაჯეს.

სამივეს ბრალი ჰქონდა წაყენებული ექსტრემისტული ორგანიზაციის წევრობისთვის. ხასანოვს პატიმრობის გარდა დანაშაულებრივი საქმიანობისთვის 1 მლნ რუბლის (12 900 აშშ დოლარის) ჯარიმის გადახდა დაეკისრა.

გამოძიების ინფორმაციით, კამილიანოვა ტრავესტი-არტისტების გამოსვლას იღებდა, ხოლო კლიმოვი „ტელეგრამში“ LGBT ურთიერთობების პროპაგანდას ეწეოდა. კლუბში არატრადიციული ორიენტაციის ადამიანები იკრიბებოდნენ. ეს დაწესებულება მხარს უჭერდა „აკრძალული საზოგადოებრივი გაერთიანების, LGBT“-ს შეხედულებებს.

2023 წლის ნოემბერში რუსეთის უზენაესმა სასამართლომ „საერთაშორისო მოძრაობა LGBT“ ექსტრემისტულ ორგანიზაციად გამოაცხადა. ოფიციალურად მსგავსი სახელწოდების ორგანიზაცია არ არსებობს. რუსეთის სასამართლოს ვერსიით, ეს მოძრაობა აშშ-ში შეიქმნა, ხოლო რუსეთი 1984 წლიდან მოქმედებს და არის „შობადობის შემცირების პოლიტიკის და არატრადიციული ოჯახური ურთიერთობების წახალისების“ ნაწილი.