უკრაინაში თავდაცვის მინისტრის, ფიოდოროვის გადაყენების წინააღმდეგ აქციები მიმდინარეობს

კიევში ვოლოდიმირ ზელენსკის მიერ თავდაცვის სამინისტროს ხელმძღვანელის პოსტიდან მიხაილ ფიოდოროვის გადაყენების გადაწყვეტილების წინააღმდეგ საპროტესტო აქციები მიმდინარეობს. დემონსტრაცია ივან ფრანკოს სახელობის თეატრთან მდებარე სკვერში იმართება. მომიტინგეები სკანდირებენ „ფიოდოროვს“ და ხელში უკავიათ პლაკატები წარწერებით: „რისთვის?“, „არ შეეხო იმას, რაც მუშაობს“ და „ვოვა, რას აკეთებ?“. აქციები მიხაილ ფიოდოროვის მხარდასაჭერად სხვა ქალაქებშიც, კერძოდ, ნიკოლაევში, ხარკოვში, დნიპროში, პოლტავასა და ტერნოპოლშიც იმართება.

მანამდე ცნობილი გახდა, რომ უკრაინის პრეზიდენტმა ვოლოდიმირ ზელენსკიმ ქვეყნის თავდაცვის სამინისტროს ხელმძღვანელობა იგორ კლიმენკოს, შინაგან საქმეთა მოქმედ მინისტრს შესთავაზა.

„უკრაინსკაია პრავდას“ ინფორმაციით, მიხაილ ფიოდოროვის გადადგომის შესახებ გადაწყვეტილების მიღება ზელენსკის „მარტივად არ მიუღია“. მან ეს ნაბიჯი იმით ახსნა, რომ აღარ შეუძლია შეეგუოს თავდაცვის მინისტრსა და შეიარაღებული ძალების მთავარსარდალ ალექსანდრ სირსკის შორის არსებულ მუდმივ კონფლიქტს. პრეზიდენტმა ცალკე ხაზგასმით აღნიშნა, რომ ფიოდოროვმა ვერ განახორციელა მის მიერ დაპირებული მობილიზაციის რეფორმა. გამოცემის წყაროები ასევე აღნიშნავენ, რომ ვოლოდიმირ ზელენსკიმ ფიოდოროვს პრემიერ-მინისტრის პოსტი შესთავაზა, თუმცა მან უარი თქვა.