14-მა ქვეყანამ მხარი დაუჭირა საუდის არაბეთის ხელმძღვანელობით მრავალეროვნული „საზღვაო თავდაცვის ალიანსის“ შექმნის წინადადებას

საუდის არაბეთის თავდაცვის სამინისტროს განცხადებით, 14-მა ქვეყანამ მხარი დაუჭირა საუდის არაბეთის წინადადებას მრავალეროვნული „საზღვაო თავდაცვის ალიანსის“ შექმნის შესახებ, რომელიც მიზნად ისახავს საერთაშორისო საზღვაო მარშრუტებისა და გლობალური ვაჭრობის დაცვას.

ეს ქვეყნებია: საუდის არაბეთი, ქუვეითი, ბაჰრეინი, კატარი, პაკისტანი, თურქეთი, ეგვიპტე, იორდანია, იემენი, ბანგლადეში, ნიგერია, სუდანი, ჯიბუტი და სომალი.

სამინისტროს ცნობით, ინიციატივასთან დაკავშირებულ შეხვედრას 43 ქვეყნის სამხედრო მეთაურები და სხვა წარმომადგენლები დაესწრნენ, პირადად, ან ვიდეოჩართვით. შეხვედრაში ასევე მონაწილეობდა ევროკავშირის დელეგაცია.

განცხადების თანახმად, მონაწილეებმა განიხილეს კომერციულ გემებზე, ენერგომატარებლებსა და საზღვაო ინფრასტრუქტურაზე თავდასხმები, ასევე ის რისკები, რომლებსაც ეს თავდასხმები ნავიგაციას, გლობალური მიწოდების ჯაჭვებსა და საერთაშორისო ეკონომიკას უქმნის.

„შეთანხმდნენ, რომ საუდის არაბეთის სამეფო იქნება ალიანსის დამფუძნებელი და წამყვანი ქვეყანა და იქ განთავსდება მისი მთავარი შტაბ-ბინა“, - ნათქვამია განცხადებაში.

განცხადების თანახმად, ალიანსი წარმოადგენს „ღია საერთაშორისო თავდაცვით ინიციატივას“ იმ ქვეყნებისთვის, რომლებიც იზიარებენ მის მიზნებსა და პრინციპებს და ის შეეცდება, გააძლიეროს საზღვაო უსაფრთხოება და შეინარჩუნოს „ნავიგაციისა და გლობალური ვაჭრობის თავისუფლება“.

სამინისტროს ცნობით, 14-მა ქვეყანამ ერთობლივი განცხადება გაავრცელა, რომელშიც მხარი დაუჭირა პროექტს და მიესალმა მისი დაფუძნების შესახებ მიღწეულ კონსენსუსს. ამავე ცნობით, სხვა მონაწილე ქვეყნებმაც გამოთქვეს მხარდაჭერა და ასრულებენ შიდა დამტკიცების პროცედურებს.