„ამბასადორის“ შესახებ ჩანაწერი ბათუმის საკრებულომ ბულვარის გენგეგმიდან ამოიღო - გაზეთი „ბათუმელები“

დღეს, 22 აგვისტოს, ბათუმის საკრებულომ მხარი დაუჭირა გადაწყვეტილებას, რომლის თანახმადაც ბათუმის ბულვარის დაცვისა და განვითარების გეგმიდან ამოიღეს ჩანაწერი, რომ „ამბასადორის“ პროექტი ბულვარისთვის შეუსაბამოა.

საუბარია ბულვარის ცენტრალურ შესასვლელში შპს „ამბასადორი ბათუმის“ მშენებარე, 21-სართულიან სასტუმროზე.

ბულვარის გენგეგმის დოკუმენტიდან „ამბასადორის“, როგორც „შეუსაბამო“ შენობის შესახებ ჩანაწერის ამოსაღებად საკრებულოს თავად კომპანიამ მიმართა.

დღეს აღნიშნული საკითხის განხილვას ბათუმის საკრებულოს სხდომაზე დაპირისპირება მოჰყვა.

ოპოზიციამ გადაწყვეტილება შეაფასა, როგორც „ქალაქისთვის დამაზიანებელი“.

„ბიძინა ივანიშვილის დავალებით, დღეს გენგეგმა იქნა დახლეჩილი. გენგეგმა, რომელშიც გადავიხადეთ ნახევარი მილიონი ლარი და კონკრეტული ბიზნესმენების, ვიღაც ჩინოვნიკების კეთილგანწყობისთვის, რომ ადამიანებს არ მოსწონთ სიტყვა „შეუსაბამო“ – დღეს ეს ამოიღეს.

ეს იმიტომ ხდება, რომ არის სასამართლო დავა და მურუსიძე-ჩინჩალაძის მოსამართლეს უხსნიან ხელ-ფეხს, რომ დააკანონოს „ამბასადორი“ და „გააპრავოს“ ეს „ქართულმა ოცნებამ“.

ბათუმს გადაახიეს თავზე ის დადგენილება, რაშიც ამდენი ფულია დახარჯული.“ – განაცხადა საკრებულოს სხდომიდან გამოსულმა ლაშა კილაბერიამ, „ერთიანი ნაციონალური მოძრაობის“ წევრმა ბათუმის საკრებულოში.

„ამბასადორი“ ბათუმის ბულვარში 21-სართულიან სასტუმროს აშენებს, აქედან 3 მიწისქვეშა სართულია. კომპანიამ სამშენებლო პროექტს 2 სართული ჯერ უნებართვოდ დაამატა, შემდეგ მიმართა სააგენტოს ნებართვისთვის და მიიღო კიდეც ნებართვა. სწორედ ამ ნებართვას ასაჩივრებს სასამართლოში „სოციალური სამართლიანობის ცენტრი“ ორგანიზაცია „ბათომთან“ ერთად.

წყარო: გაზეთი „ბათუმელები“

ასევე დაგაინტერესებთ:

🔵 “ქართული ტალანტი”, “ჯადოქარი”, “კვარდონა”, “ფენომენი” - ხვიჩა კვარაცხელია იტალიური მთავარი სპორტული გამოცემის პირველ გვერდზე

🔵 ლაშა მძინარაშვილი ჰოლივუდში ტაურუსის მსოფლიო კასკადიორთა დაჯილდოებაზე საუკეთესო ბრძოლის სცენის კატეგორიაშია ნომინირებული

🔵 „ვითომ თავდადებული და ამ დროს, მხდალი! ვითომ მამაცი და ამ დროს, ლაჩარი!“ - რას წერს ირმა ინაშვილი?