"გადაცემაში ცენზურის არსებობას უარვყოფთ" - "ახალი კვირა" განცხადებას ავრცელებს

საზოგადოებრივმა მაუწყებელმა საკვირაო გადაცემა „ახალი კვირა“ დახურა.

გადაცემას და მის ჟურნალისტებს  ძალადობრივი დაჯგუფება „ალტ-ინფო“ ემუქრებოდა.

თავდაპირველი ინფორმაცია ამის შესახებ, გადაცემის წამყვანმა იმედა დარსალიამ გაავრცელა.

აღნიშნულთან დაკავშირებით პირველ განცხადებას ამჯერად გადაცემა "ახალი კვირის" გუნდი აკეთებს:

"გადაცემა „ახალი კვირა“ ოთხი წელია, პირველი არხის ეთერშია.

ჩვენ მიერ მომზადებული რეპორტაჟები ყოველთვის პრობლემურ და აქტუალურ თემებს ეხებოდა, ჩვენთვის პრიორიტეტი ხალხის პრობლემების ობიექტურად გაშუქება და საზოგადოების ინტერესების დაცვაა.

„ახალი კვირის“ გუნდისთვის ღირსების საკითხია, ობიექტურად და მიუკერძოებლად გავაშუქოთ ნებისმიერი თემა, რაზეც ჩვენი რეპორტაჟები ნათლად მეტყველებს.

გადაცემის ირგვლივ განვითარებულ მოვლენებთან დაკავშირებით, განვმარტავთ, რომ „ახალი კვირის“ გუნდი 2018 წლიდან პროფესიული სტანდარტის სრული დაცვით მუშაობს – დამოუკიდებელ და თავისუფალ გარემოში.

შესაბამისად, გავრცელებულ მოსაზრებას გადაცემაში ცენზურის არსებობის შესახებ, უარვყოფთ.

თამარ გოგესაშვილი

თამარ ოდიშარია

ნინუცა კახნიაური

ბელა ზაქაიძე

ანა ნოდია

ნატა ტაბიძე

ოთარ გიორგაძე

ანუკი მასხარაშვილი",- აღნიშნულია განცხადებაში.

საზოგადოებრივი მაუწყებლის ეთერში გადაცემა „ახალი კვირა“ აღარ გადის. მაუწყებლის ხელმძღვანელობამ ერთ-ერთი ყველაზე რეიტინგული გადაცემა ყოველგვარი განმარტების გარეშე, რეორგანიზაციის საბაბით  დახურა.

ამავე თემაზე:

📍„ძალიან არ მინდა გადაცემის შეჩერება დავუკავშირო მუქარებს, რაც „ალტ-ინფოს“ ლიდერებისგან მოდიოდა“ - იმედა დარსალია

📍საზოგადოებრივ მაუწყებელში იყო შავი სიები, ცდილობდნენ კონკრეტული თემები დაებლოკათ - იმედა დარსალია