გივი მიქანაძე პარიზში ვიზიტის შესახებ: მქონდა შესაძლებლობა, დამსწრე საზოგადოებისთვის გამეცნო რეფორმების შედეგები, რომელიც საქართველოში ხორციელდება

საქართველოს განათლების მინისტრმა, პარიზში, UNESCO-ს სათავო ოფისში გამართულ „განათლების ტრანსფორმაციის სამიტში“ მიიღო მონაწილეობა. ღონისძიების შემდეგ, გივი მიქანაძემ იმ საკითხების შესახებ ისაუბრა, რომელიც დამსწრე საზოგადოებას გააცნო. მან 40-მდე ქვეყნის ლიდერებს საქართველოში მიმდინარე საგანმანათლებლო რეფორმები და დაგეგმილი ინიციატივები გააცნო.

ვიზიტის ფარგლებში, მინისტრმა ორმხრივი შეხვედრები გამართა UNESCO-ს ხელმძღვანელ პირებთან.

„მქონდა შესაძლებლობა, სიტყვით გამოვსულიყავი და დამსწრე საზოგადოებისთვის გამეცნო მიმდინარეობა და უკვე, პირველადი შედეგები იმ რეფორმებისა, რომელიც უმაღლესი განათლებისა და ზოგადი განათლების მიმართულებით ხორციელდება საქართველოში. ასევე, განვიხილეთ ის სიახლეები, მათ შორის მასწავლებელთა კარიერული განვითარების ახალი სქემა, რომელიც საქართველოში დაინერგა და განხორციელების სტადიაზე და გვქონდა შესაძლებლობა, დამსწრე საზოგადოების კითხვებისთვის მეპასუხა და მიმეწოდებინა ამომწურავი ინფორმაცია“, - აღნიშნა გივი მიქანაძემ.
სამიტის მთავარი მიზანი ხარისხიანი განათლების ხელმისაწვდომობის უზრუნველყოფა და 2022 წლის შემდეგ მიღწეული პროგრესის შეჯამება იყო. ღონისძიებას ესწრებოდა საგანგებო და სრულუფლებიანი ელჩი საფრანგეთში, მუდმივი წარმომადგენელი იუნესკოში, ირაკლი ყურაშვილი.

„ორმხრივი გამართული შეხვედრების შემდეგ, ბატონმა მინისტრმა მიიღო მონაწილეობა პანელში, სადაც კოლეგებთან მონტენეგროდან, ქუვეითიდან და სხვა ქვეყნებიდან, ისაუბრეს მიმდინარე გამოწვევებზე განათლებისა, რომელიც არის მომავალი ახალგაზრდობის“, - აცხადებს ირაკლი ყურაშვილი.