ირაკლი ზარქუა - კოლექტიურ „ნაცმოძრაობაში“ მშვენიერი პროცესი მიმდინარეობს, ბელადი იქით თუხთუხებს, აქეთ ახალი სახეები, „ტოპ ტვინები“ მოჰყავთ

„ბრძოლა მიდის პირველობაზე, „ნაცებს“, „ნეო ნაცებსა“ და „კარენოი ნაცებს“ შორის“, – ამის შესახებ საქართველოს პარლამენტის დიასპორის საკითხთა კომიტეტის თავმჯდომარემ ირაკლი ზარქუამ განაცხადა.

ზარქუას თქმით, „კოლექტიურ „ნაცმოძრაობაში“ მშვენიერი პროცესი მიმდინარეობს“.

„ოპოზიციური სპექტრი უკვე ნანობს, რომ პარლამენტში არ შემოვიდნენ. კულისებიდან ინფორმაცია გამოდის, ვის რა პოზიცია ჰქონდა და როგორ დირიჟორობდნენ გარკვეული საელჩოები, რომ არ შემოსულიყვნენ, თორემ შემოსვლა ყველას უნდოდა. ხარობდნენ იმ შედეგებს, რაც მიიღეს, რადგან ასეთ შედეგებს არც ელოდნენ. ბრძოლა მიდის პირველობაზე „ნაცებს“, „ნეო ნაცებსა“ და „კარენოი ნაცებს“ შორის. „ჩერგო“ რამის დამთმობია? გამორიცხულია. ის ბელადი იქიდან რამის დამთმობია?! ახალ ვარცხნილობასთან ერთად, „პრიჩოსკა“ აქვს, სიახლე შემოიტანა პოლიტიკაში, რამის დამთმობია? იქიდან დირიჟორობს. რევოლუციური გადაწყვეტილება შემოიტანა – ნანუკა შემოჰყავს პოლიტიკაში.

აქამდე რა, არ იყო ნანუკა? იყო, მაგრამ ახლა მორიგი სიგიჟე უნდა. თავიანთ ამომრჩევლებს აგიჟებენ, ახალი სისხლიო. ვინ არის ახალი? ქალი დღე და ღამე მმართველი პარტიის ლანძღვაშია და „ნაცმოძრაობის“ გვერდით, მიშას პლაკატებით დარბის. ახალი კადრია? არა. ერთმანეთს ატყუებენ. თან უნდათ, იმ ე.წ. ალიანსში პირველობა აიღონ და აჯაფსანდალია. სიმართლე გითხრათ, ისინი არც მაინტერესებს, ვხალისობთ ხოლმე. კოლექტიურ „ნაცმოძრაობაში“ ატარონ რევოლუციები და ქვეყანას თავი დაანებონ. კოლექტიურ „ნაცმოძრაობაში“ მშვენიერი პროცესი მიმდინარეობს. ბელადი იქით თუხთუხებს, აქეთ ახალი სახეები, „ტოპ ტვინები“ მოჰყავთ“, – განაცხადა ირაკლი ზარქუამ.