ლევან მაჭავარიანი: აშშ-სთან ურთიერთობას ვერ ალაგებენ, ამაზე მეტყველებს ისიც, რომ ქალბატონი კალასი, რომელიც საგარეო ურთიერთობებს ხელმძღვანელობს, ვერ ახერხებს მარკო რუბიოსთან ერთწუთიანი შეხვედრის ჩანიშვნასაც კი

„თუ აშშ-სთან ასეთი დაძაბული ურთიერთობა ექნებათ და ფაქტობრივად ეს ურთიერთობა თუ აღარ იარსებებს, მათ აღარ ეყოლებათ უსაფრთხოების გარანტორი, რომლის გამოც, ევროკავშირი თავის მხრივ ამდენი წლის განმავლობაში საინტერესო იყო“, - განაცხადა ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა.

დეპუტატმა კომენტარი გააკეთა მარტა კოსის განცხადებასთან დაკავშირებით, რომელმაც თქვა, რომ ევროკავშირში გაწევრიანების მსურველმა ქვეყნებმა დონალდ ტრამპის MAGA-ს მოძრაობასთან კავშირები უნდა გაწყვიტონ.

„ევროკავშირი ძალიან იზოლაციურ პოლიტიკას ეწევა თავისთვის და სურს, რომ დანარჩენ ქვეყნებზეც ანალოგიური გავრცელდეს. ისინი აშშ-სთან ურთიერთობას ვერ ალაგებენ, ამაზე მეტყველებს ისიც, რომ ქალბატონი კალასი, რომელიც საგარეო ურთიერთობებს ხელმძღვანელობს, ვერ ახერხებს ამ წელიწად-ნახევრის განმავლობაში მარკო რუბიოსთან ერთწუთიანი შეხვედრის ჩანიშვნასაც კი.

თუ აშშ-სთან ასეთი დაძაბული ურთიერთობა ექნებათ და ფაქტობრივად ეს ურთიერთობა თუ აღარ იარსებებს, მათ აღარ ეყოლებათ უსაფრთხოების გარანტორი, რომლის გამოც, ევროკავშირი თავის მხრივ ამდენი წლის განმავლობაში საინტერესო იყო. ვინაიდან ყველამ კარგად ვიცით, რომ ის უსაფრთხოების ქოლგა, რომელსაც ნატო სთავაზობს ევროკავშირი წევრ ქვეყნებს, ეს ყველაფერი უზრუნველყოფილია აშშ-ის მიერ“, - აღნიშნა მაჭავარიანმა.