ლევან მაჭავარიანი - ხაბეიშვილმა ფარ-ხმალი დაყარა და სავარაუდოდ, ცდილობს, „ნაციონალური მოძრაობის“ და კოლექტიური ოპოზიციის რადიკალურ დღის წესრიგს გაემიჯნოს

„როგორც ჩანს, ლევან ხაბეიშვილმა კარგად გაიაზრა, რომ აბსურდში ცხოვრებას აზრი აღარ აქვს და სავარაუდოდ, ცდილობს, რეალობას თვალი გაუსწოროს. ამ შემთხვევაში, ის იმ ხაზს უნდა დათანხმდეს, რასაც „ქართული ოცნება“ მიჰყვება და უნდა თქვას, რომ უალტერნატივოა ჩვენი ხაზი და პოლიტიკა, როგორც საგარეო, ისე საშინაო“, – ამის შესახებ პარლამენტის ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა განაცხადა.

„ისიც კარგად გაიაზრა, რომ „ქართულმა ოცნებამ“ ჩვენი ეროვნული პოლიტიკით და მოქალაქეების დაკვეთის შესრულებით მოვიგეთ არჩევნები. ლევან ხაბეიშვილმა ფარ-ხმალი დაყარა და სავარაუდოდ, ცდილობს, „ნაციონალური მოძრაობის“ და კოლექტიური ოპოზიციის რადიკალურ დღის წესრიგს რაღაცნაირად გაემიჯნოს. შევხედოთ, როგორ განვითარდება მოვლენები და გააგრძელებს თუ არა იგი ამ მესიჯბოქსს, რაც ჯამურად კოლექტიურ „ნაციონალურ მოძრაობას“ აქვს“, – აღნიშნა ლევან მაჭავარიანმა.

„ერთიანი ნაციონალური მოძრაობის“ პოლიტსაბჭოს თავმჯდომარემბლევან ხაბეიშვილმა ციხიდან წერილი გამოაქვეყნა, რომელშიც წერს: „ოკუპანტ რუსებთან გვექნება რაციონალური, სახელმწიფოებრივი პოლიტიკა, რაც უპირობოდ უზრუნველყოფს სტაბილურობას, მშვიდობას და საქართველოს ინტერესების ღირსეულ დაცვას“. ამასთან, ხაბეიშვილი აღნიშნავს: „საქართველოში არასდროს იქნება ერთსქესიანთა ქორწინება, ოჯახი იყო, არის და იქნება ქალისა და მამაკაცის ერთობა“.