ლევან მახაშვილის განცხადებით, კოპენჰაგენში განვითარებული მოვლენების დროს თუ ჰქონდა ადგილი ადამიანის უფლებების დარღვევას, მაშინ რატომ არ არის რეაგირება ბრიუსელის მხრიდან

პარლამენტის ევროპასთან ინტეგრაციის კომიტეტის თავმჯდომარის, ლევან მახაშვილის განცხადებით, კოპენჰაგენში განვითარებული მოვლენების დროს თუ ჰქონდა ადგილი ადამიანის უფლებების დარღვევას, მაშინ რატომ არ არის რეაგირება ფაქტზე ბრიუსელის მხრიდან.

„დანიაში რაც ხდება, თუ ეს იყო ადამიანის უფლებების დარღვევა, მაშინ სად არის რეაგირება ან დანიის, ან სად არის კრიტიკა ბრიუსელის თუ ნებისმიერი სხვა დედაქალაქის მხრიდან?! თუ ნორმა იყო ის, რაც მოხდა დანიაში, მაშინ საქართველოსთან დაკავშირებით უხვად, რომ არ იშურებდნენ კრიტიკას და ასეთ შეფასებებს ამ წლების განმავლობაში, მაშინ რასთან გვაქვს საქმე? საქართველო დაბალი ღობეა?! არ შეუძლია ჩვენს ქვეყანას, რომ დაიცვას სახელმწიფო და საზოგადოება?! არ გვაქვს ამის უფლება?“, - განაცხადა მახაშვილმა.

დანიაში აქციის დასაშლელად პოლიციამ ხელკეტები გამოიყენა. ვრცელდება ვიდეოც, სადაც პოლიცია მედიის წარმომადგენელსაც გაუსწორდა ფიზიკურად.

კოპენჰაგენში განვითარებული მოვლენების შესაფასებლად, საქართველოს პრემიერ-მინისტრმა ურსულა ფონ დერ ლაიენს, ანტონიო კოშტასა და რობერტა მეცოლას ღია წერილით მიმართა.

დანიის მხარეს მოვლენების შესაფასებლად „ქრონიკამაც“ მიმართა, რაზეც „იმედს“ დანიის ეროვნულმა პოლიციამ უპასუხა, რომ პოლიციას დროებით მოუწია ხელკეტების გამოყენება მას შემდეგ, რაც აქციის მონაწილეებმა უკანონოდ გადაკვეთეს კერძო საკუთრებაში არსებული ტერიტორია და უარი განაცხადეს პოლიციის მითითებების შესრულებაზე.