მაჭავარიანი: 2022 წელს ბორის ჯონსონმა ჩაშალა მოლაპარაკება, რომელსაც მიაღწიეს რუსულმა და უკრაინულმა მხარეებმა, მან უკრაინელი ხალხი მოატყუა, რომ დაჩქარებული წესით ნატოში მიიღებდნენ და დასავლეთის დახმარებით რუსეთს დაამარცხებდნენ

სამწუხაროდ, ვატყობთ, რომ ეს ომი ვერ სრულდება მიუხედავად ბატონი დონალდ ტრამპის ბევრი და სერიოზული მცდელობისა. რაც უფრო ხანგრძლივია ეს ომის, კიდევ უფრო მეტი გახანგრძლივება სჭირდებათ, ვინაიდან ის ძალები, ვისზეც ჩვენ ვსაუბრობთ, დაინტერესებულები არიან ხანგრძლივი ომით, - განაცხადა გადაცემაში „დღის ქრონიკა“ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა რუსეთ-უკრაინის ომსა და ევრო ბიუროკრატების ინტერესებზე საუბრისას.

მან ხაზი გაუსვა ევრო ბიუროკრატების შეცვლილ პოზიციას რუსეთთან დიალოგის აუცილებლობის შესახებ და გაიხსენა, რომ 2022 წელს რუსეთ-უკრაინის მოლაპარაკება დიდი ბრიტანეთის იმდროინდელმა პრემიერმა ჩაშალა.

„ევრო ბიუროკრატები დღეს საუბრობენ, რომ თურმე რუსეთთან დიალოგი საჭირო ყოფილა, როდესაც 4 წლის განმავლობაში ყველას უკრძალავდნენ ამას. ბრიტანეთზე მოვიყვან მაგალითს - 2022 წლის აპრილში ეს ომი სრულდებოდა. ბორის ჯონსონმა ჩაშალა ის მოლაპარაკება, რომელსაც მიაღწიეს რუსულმა და უკრაინულმა მხარეებმა, ვინაიდან უკრაინული მხარე და უკრაინელი ხალხი მოატყუა, რომ დაჩქარებული წესით ნატოში მიიღებდნენ და დასავლეთის დახმარებით რუსეთს დაამარცხებდნენ.

მათ [ევრო ბიუროკრატებს] ახლა სახის შენარჩუნება უნდათ - ახლა ომი ასე რომ დასრულდეს, რუსეთს უფრო მეტი ტერიტორია აქვს დაკავებული, ვიდრე უკრაინას. ან ბატონი ზელენსკი რით ახსნის ამ ყველაფერს საკუთარ მოსახლეობასთან, რომ ამდენი დაღუპულია, 20 მილიონი უსახლკაროდ დარჩენილი, განადგურებული ინფრასტრუქტურა, განადგურებული ქვეყანა და ტერიტორიების კუთხით გაცილებით უარეს მდგომარეობაში, ვიდრე 2022 წლის აპრილში, როდესაც არც დაღუპულების რაოდენობა იყო ამდენი და არც უსახლკაროდ დარჩენილების. აქედან გამომდინარე, ამ ომის გაჭიანურება სჭირდებათ ამ ძალებს, ამ აქტორებს.

რა თქმა უნდა, მათი გადმოსახედიდან საქართველო არის შესანიშნავი ქვეყანა ამ ყველაფრისთვის. ასევე ისევ საკუთარი ხალხისთვის „გასაპრავებლად“ გამოადგებოდათ - რომ გაუძვირეს საკუთარ მოსახლეობას ცხოვრება, ეტყოდნენ, რომ აი, რუსეთი მარტო უკრაინაში კი არ შევიდა, საქართველოც რა დღეში ჩააგდო. მათ სტატისტიკისთვის ვჭირდებით და რა თქმა უნდა, ჩვენ თავს არავის გამოვაყენებინებთ”, - განაცხადა მაჭავარიანმა.

დეპუტატის შეფასებით საქართველოს მოქალაქეები დარწმუნდნენ, რომ ქვეყნის ხელისუფლებამ ბოლო 4 წლის განმავლობაში ძლიერ ზეწოლას გაუძლო.

„ჩვენი მოქალაქეები ამ 4 წლის განმავლობაში დარწმუნდნენ, რომ ჩვენ ძალიან სერიოზულ წნეხს, ზეწოლას, შანტაჟს გავუძელით იქიდან გამომდინარე, რომ ჩვენს უკან ჩვენი ქვეყანაა. გამორიცხულია, რაიმე ისეთი ნაბიჯი გადაგვადგმევინონ, რომელიც რაღაც საფრთხის წინაშე დააყენებს ჩვენს ქვეყანას და რომელიც არ ემსახურება ჩვენი ქვეყნის ეროვნულ ინტერესებს. მეგობრების რჩევას ჩვენ ყოველთვის გავითვალისწინებთ, მაგრამ გამორიცხულია, ისეთი რჩევა და მით უმეტეს, მითითება გავითვალისწინოთ, რომელიც ეწინააღმდეგება ჩვენი ქვეყნის ეროვნულ ინტერესს”, - განაცხადა მაჭავარიანმა.