მაჭავარიანი აშშ-თან ურთიერთობაზე: სასიამოვნოა ის სიგნალები, რომელიც რუბიოსა და ვენსის მხრიდან მოდის, ჩვენ მზად ვართ დავსხდეთ ამერიკულ მხარესთან და დროსა და სივრცეში გავწეროთ კონკრეტული გზამკვლევი

ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა აშშ-თან ურთიერთობების გადატვირთვასთან დაკავშირებით ისაუბრა და აღნიშნა, რომ ვაშინგტონიდან პოზიტიური სიგნალები მოდის და ახლა მთავარია რა ნაბიჯები გადაიდგმება ორ ქვეყანას შორის ურთიერთობების გადატვირთვის კუთხით.

როგორც დეპუტატი აღნიშნავს, ბურთი თავიდან ბოლომდე აშშ-ის მოედანზეა.

„ძალიან სასიამოვნოა ის სიგნალები, რაც ბატონი რუბიოს, ბატონი ვენსის მხრიდან, ასევე, ის შეხვედრები, რომელიც ბატონ მამუკა მდინარაძეს ჰქონდა უშუალოდ ვაშინგტონში, რა თქმა უნდა, ეს ყველაფერი გვანარჩუნებინებს იმის იმედს, რომ შესაძლებელია აშშ-თან გადაიტვირთოს ჩვენი ურთიერთობები და დაიწყოს რეალური პარტნიორობა.

ჩვენი პრემიერ-მინისტრის დონიდან დაწყებული და რიგითი დეპუტატით დამთავრებული, ჩვენ ძალიან ხშირად ვიმეორებთ სწორედ ამ კონკრეტიკას - მზად ვართ დავსხდეთ ამერიკულ მხარესთან და დროსა და სივრცეში გავწეროთ კონკრეტული გზამკვლევი, სადაც გაწერილი იქნება, თუ რა ნაბიჯები არის გადასადგმელი ჩვენი მხრიდან, რა ნაბიჯები არის გადასადგმელი აშშ-ის მხრიდან იმისათვის, რომ ორივე ქვეყნის ინტერესები იქნეს გათვალისწინებული და დაცული.

რა თქმა უნდა ოპტიმიზმი შენარჩუნებული გვაქვს სწორედ იმ სიგნალებიდან გამომდინარე, იმ შეხვედრებიდან გამომდინარე, რაზეც ზემოთ ვისაუბრე და ხაზი გავუსვი. აქედან გამომდინარე ჩვენ ამ ყველაფრის რა თქმა უნდა ველით და ეს ეტაპი, როდესაც დადგება ჩვენ ამ ყველაფერს საზოგადოებას მოვუყვებით. ჩვენ ოპტიმისტურად ვართ განწყობილები, თუმცა ბურთი თავიდან ბოლომდე აშშ-ის მოედანზეა“, - აღნიშნა მაჭავარიანმა.