მაია ბითაძე: ჩვენი განცხადებები ყურს მიღმა არ დარჩენილა, უფრო ღიად ვსაუბრობთ ორმაგ სტანდარტზე, რომელსაც ჩვენ წინააღმდეგ იყენებენ

ძალიან მკაცრი იყო ჩვენი განცხადებები და მინდა, გითხრათ, რომ ჩვენი განცხადებები ყურს მიღმა არ დარჩენილა, - ამის შესახებ მმართველი გუნდის დეპუტატმა მაია ბითაძემ „დღის ქრონიკაში“ ეუთოს საპარლამენტო ასამბლეის ბოლო სესიაზე საუბრისას განაცხადა.

გარემოს დაცვისა და ბუნებრივი რესურსების კომიტეტის თავმჯდომარემ საქართველოს წინააღმდეგ ორმაგი სტანდარტის გამოყენებას გაუსვა ხაზი.

„ერთია, რომ ეს საოლქო ჩანაწერებში რჩება და მეორეა, რომ უფრო ღიად ვსაუბრობთ ამ ორმაგ სტანდარტზე, რომელსაც ჩვენ წინააღმდეგ იყენებენ. დაიწყო ევროპარლამენტით, გაგრძელდა ევროსაბჭოთი და ახლა ბოლო ბასტიონი აიღო ჯო უილსონმა - ეუთო ჩააყენა ძალიან უხერხულ მდგომარეობაში.

ბუნებრივია, ეს აფრთხობს მათ შორის საპარლამენტო ასამბლეას, იმიტომ რომ ეს არ არის ის, რისთვისაც ეს ორგანიზაცია შეიქმნა. ყველაზე ცუდი, რაც მოხდა - ეუთოს სადამკვირვებლო მისიის 2024 წლის ანგარიში ეუთომ თვითონვე დააყენა კითხვის ნიშნის ქვეშ. ეს არის აბსურდი საერთაშორისო სამართლისთვის“, - აღნიშნა ბითაძემ.

მან აღნიშნა, რომ ასამბლეაზე მიღებულ რეზოლუციებისა და დეკლარაციების აღსრულება სავალდებულო კომპონენტი არ არის, ამიტომ მათ საქართველოს წინააღმდეგ ჰიბრიდული ომისთვის იყენებენ, რომ ეს იყოს ნიმუში იქ წარმოდგენილი სხვა სახელმწიფოებისთვის, რომ არ გაბედონ და საკუთარი ხმა არ დააფიქსირონ.

მისივე თქმით, ევროკავშირის წევრი ქვეყნებიც ახალ ჯგუფებს ქმნიან, იმისთვის რომ ხმა აიმაღლონ უსამართლობის წინააღმდეგ, რასაც საერთაშორისო ორგანიზაციების პოლიტიკური ინსტრუმენტალიზაცია ჰქვია.

„აქ აღარ არის საუბარი იმაზე, რომ სახელმწიფოები თანასწორუფლებიანები უნდა იყვნენ. აქ საუბარია იმაზე, რომ საერთაშორისო ორგანიზაციების გადაწყვეტილებები გამოიყენება სახელმწიფოთა სუვერენული ინტერესებისა და ხმის ჩასაქრობად, ამიტომ, ამის წინააღმდეგ რეაგირება მუდმივად გვექნება და აუცილებლად გვექნება რეაგირება ჯო უილსონის მუქარის წინააღმდეგ“, - დასძინა მაია ბითაძემ.