მაკა ბოჭორიშვილი: ჩვენთვის ეუთოს უსაფრთხოების ფორუმი მნიშვნელოვანია, რადგან საქართველოს აქვს გამოწვევები ოკუპაციის თვალსაზრისით

საქართველოსთვის ეუთოს ფორუმის თავმჯდომარეობა იქნება კიდევ ერთი შესაძლებლობა, ორგანიზაციის მუშაობაში შეიტანოს წვლილი, - ამის შესახებ საგარეო საქმეთა მინისტრმა მაკა ბოჭორიშვილმა საქართველოს თავმჯდომარეობით გამართული ეუთოს ფორუმის დასრულების შემდეგ განაცხადა.

მისი თქმით, ეუთოს უსაფრთხოების ფორუმზე უსაფრთხოების გამოწვევების შესახებ მსჯელობა მიმდინარეობს.

„ეს უსაფრთხოების ფორუმი არის ფორმატი, სადაც ძირითადად ხდება ეუთოს რეგიონში უსაფრთხოების კუთხით არსებული გამოწვევების შესახებ მსჯელობა. საქართველოსთვის ფორუმის თავმჯდომარეობა იქნება კიდევ ერთი შესაძლებლობა, ორგანიზაციის მუშაობაში შეიტანოს წვლილი.

ჩვენთვის ეს საერთაშორისო ორგანიზაცია არის მნიშვნელოვანი, რადგან თავად საქართველოს აქვს უსაფრთხოების ძალიან მნიშვნელოვანი გამოწვევები ოკუპაციის თვალსაზრისით.

მნიშვნელოვანია, რომ ამ ჩარჩოში იყოს მუდმივად მსჯელობა და ჩვენთვის მნიშვნელოვან საკითხებზე იყოს აქცენტები გაკეთებული. მათ შორის, როდესაც ვსაუბრობთ საერთაშორისო ნორმების შესრულებაზე, როდესაც ვსაუბრობთ, რომ არ უნდა ხდებოდეს საერთაშორისო პრინციპების დარღვევა. ამ ფარგლებში ასევე შესაძლებლობა გვექნება, სხვა მნიშვნელოვან საკითხებზეც ვიმსჯელოთ.

უკრაინის საკითხი და ომი უკრაინაში რჩება ჩვენი რეგიონისთვის ისევ და ისევ მნიშვნელოვან გამოწვევად. ჩვენი დღის წესრიგიც მიმართული იქნება სწორედ ამ საკითხებზე მსჯელობის ხელშესაწყობად“, - აღნიშნა ბოჭორიშვილმა.