რეჯეფ თაიფ ერდოღანის პარტია რუსეთსა და უკრაინას ომის შეწყვეტისა და სტამბოლში მოლაპარაკებების განახლებისკენ მოუწოდებს

თურქეთის მმართველი „სამართლიანობისა და განვითარების“ პარტიის პრესმდივანმა ომერ ჩელიქმა მხარეებს რუსეთ-უკრაინის ომის დაუყოვნებლივ დასრულებისა და სტამბოლში მოლაპარაკებების განახლებისკენ მოუწოდა. მან ისინი გააფრთხილა, რომ კონფლიქტი გამომფიტავ ომად გადაიქცა, რაც შავი ზღვის რეგიონისთვის მზარდ რისკებს ქმნის.

ჩელიქმა აღნიშნა, რომ არცერთ მხარეს არ მიუღწევია ისეთი გარღვევისთვის, რომელიც ომის მსვლელობას ძირეულად შეცვლიდა, მაშინ, როდესაც რუსეთიც და უკრაინაც ტაქტიკური წარმატებების წყალობით ერთმანეთს კვლავ მნიშვნელოვან დანაკარგებს აყენებენ.

„ომი ყველა გაგებით ბოროტებაა“, - განაცხადა ჩელიქმა. მან, პირველ რიგში, ადამიანურ მსხვერპლზე გაამახვილა ყურადღება და კონფლიქტის უფრო ფართო რეგიონში გავრცელების პოტენციურ რისკებზე ისაუბრა. მან ასევე ახსენა ნატოსა და ევროკავშირში ომის შესახებ მიმდინარე დისკუსიები და შეშფოთება გამოთქვა სულ უფრო დახვეწილი იარაღის შესაძლო გამოყენებასთან დაკავშირებით.

ჩელიქმა განსაკუთრებით დაგმო შავ ზღვაში თურქეთის დროშის ქვეშ მცურავ სამოქალაქო გემებზე თავდასხმები და აღნიშნა, რომ კონფლიქტის დაწყებიდან რვა მათგანი - რუსეთის, ხოლო 35 უკრაინის სამიზნე გახდა. მან დასძინა, რომ თურქეთი აგრძელებს გაფრთხილებების შესახებ საუბარს და უმაღლეს დონეზე ყურადღებით ადევნებს თვალს პროცესების განვითარებას.

„ეს ციკლი რაც შეიძლება მალე უნდა დასრულდეს და მოლაპარაკებები სტამბოლში უნდა ჩატარდეს, რათა შეთანხმების მიღწევა საბოლოოდ შესაძლებელი გახდეს“, - დასძინა ჩელიქმა.