საქართველოს რაგბის კავშირს უკრაინის მხარდამჭერი ანონსი ევროპის რაგბის კავშირმა წააშლევინა

საქართველოს რაგბის კავშირს უკრაინის მხარდამჭერი ანონსი ევროპის რაგბის კავშირმა წააშლევინა. როგორც რუსული გამოცემა SPORT24.RU-ს მიერ გავრცელებულ ინფორმაციაში წერია, სწორედ ევროპული რაგბის მმართველმა ორგანიზაციამ მიმართა საქართველოს რაგბის კავშირს, რომ არ ეთანხმება თამაშის წინ ასეთი სტრატეგიის არჩევას და სთხოვა, ანონსი აეღო. 

რუსეთის რაგბის ფედერაციის პრესატაშე ანტონ ხალიზოვის განცხადებით, მათი ფედერაცია ანონსის გავრცელებისთანავე დაუკავშირდა ევროპის რაგბის კავშირს და სასურველი პასუხიც სწრაფადვე მიიღო.

„ევროპის რაგბის კავშირმა დაგვიდასტურა, რომ ასეთი აფიშის გავრცელება დაუშვებელია, რადგან ის არღვევს რეგლამენტს. მათგან შევიტყვეთ, რომ საქართველოს რაგბის კავშირს სთხოვეს ანონსის წაშლა“, - უთხრა ხალიზოვმა რუსულ სააგენტოებს.

საქართველოს რაგბის კავშირმა ბორჯღალოსნებსა და რუსეთის ნაკრებს შორის 27 თებერვალს გასამართი მატჩის ანონსი სოციალურ ქსელში უკრაინულ ენაზე გუშინ გაავრცელა.თუმცა ეს ანონსი კავშირის ოფიციალურ ფეისბუკის გვერდზე ატვირთვიდან დაახლოებით შვიდ საათში წაიშალა.

„ერთად შევასრულოთ საქართველოს ჰიმნი დინამოარენაზე“, - ეწერა უკრაინულ ენაზე დაწერილ მიმართვაში.

საქართველოს სარაგბო ნაკრები რუსეთს კვირას, 18:00 საათზე უმასპინძლებს თბილისის „დინამოარენაზე“, რაგბის ევროპის ჩემპიონატის მესამე ტურის შეხვედრაში.

რუსეთის მიერ დონეცკისა და ლუგანსკის "დამოუკიდებლობის" აღიარების გამო, ქართველი გულშემატკივრების ნაწილი საქართველოს ნაკრების უკრაინის დროშით ქომაგობას გეგმავს.

ასევე საინტერესოა:

🔵 „საქართველო – რუსეთის სარაგბო დაპირისპირებისას, დიდი პროვოკაცია მზადდება“ - ექსპერტი დავით ქართველიშვილი

🔵 უკრაინის საგარეო საქმეთა სამინისტრო რუსეთში მყოფ უკრაინის მოქალაქეებს რუსეთის ტერიტორიის დატოვებას ურჩევს

🔵 საქართველოს პრეზიდენტი: დღეს ჩვენ ვართ დამოუკიდებელი საქართველო და ამას რუსეთმა ვერაფერი უყო და ვერაფერს უზამს