შალვა პაპუაშვილი: ყველამ უნდა გაიაზროს, რა ბედი ელოდა საქართველოს, ხელისუფლებაში რომ ყოფილიყო იმ ადამიანების ჯგუფი, რომლებიც დღესაც სხვა ქვეყნის დროშებს აფრიალებენ

„საქართველო გამზადებული იყო, რომ მეორე ფრონტის როლი ეთამაშა და ევროკავშირის დაცვისთვის ხარჯთეფექტური ყოფილიყო“, - ამის შესახებ პარლამენტის თავმჯდომარემ შალვა პაპუაშვილმა განაცხადა.

პაპუაშვილს კითხვა დაუსვეს გერმანიის მმართველი პარტიის საპარლამენტო ფრაქციის თავმჯდომარის მოადგილის განცხადებაზე, რომელმაც აღნიშნა, რომ უკრაინის მხარდაჭერა გერმანიის უსაფრთხოების დაცვის ყველაზე ხარჯთეფექტური გზა არის.

როგორც პაპუაშვილმა აღნიშნა, ეს აჩვენებს, თუ რა ცივსისხლიანი არის საერთაშორისო პოლიტიკა და რა ადვილია ზოგიერთისთვის ასე პირდაპირ და უტიფრად საუბარი.

„უკრაინას უყურებენ, როგორც საკუთარ თავდაცვის ხაზს. არაერთხელ უთქვამთ, რომ უკრაინა არის თავდაცვის ხაზი ევროპის ქვეყნებისთვის. კი ხარჯთეფექტური, რადგან თავად არ უწევთ ბრძოლა, არ იღვრება გერმანელების, ფრანგებისა და ლიეტუველების სისხლი, იღვრება უკრაინელების სისხლი, რათა ევროკავშირის თავდაცვა იყოს უზრუნველყოფილი. ეს კიდევ ერთხელ აჩვენებს, თუ რა ცივსისხლიანი არის საერთაშორისო პოლიტიკა და რა ადვილია ზოგიერთისთვის ასეთი ტონით, ასე პირდაპირ და უტიფრად საუბარი, რომ უკრაინა გამოიყენება ევროკავშირის იაფად დასაცავად.

კიდევ ერთხელ უნდა გაიაზროს ყველამ, რა ბედი ელოდა საქართველოს, პარლამენტსა და ხელისუფლებაში რომ ყოფილიყო ჯგუფი იმ ადამიანებისა, რომლებიც დღესაც სხვა ქვეყნის დროშებს აფრიალებენ. გაუხარდებოდათ კიდეც, წინა ხაზზე ყოფილიყვნენ. სხვა რამე კი არ თქვა ზურა ჯაფარიძემ, რაღაცით დავეხმაროთ ჩვენცო, ერთ 20 000 ჯარისკაც ხომ მაინც შევაკავებთო, ბრძოლით ხომ შევაკავებთ და ვეღარ მოიცლის იქ საბრძოლველადო.

ამისთვის იყვნენ მზად, ამისთვის იყო გამზადებული საქართველო. ამისთვის იყო მცდელობა 2020 წელს არჩევნების შედეგების გაყალბებისა, ამისთვის იყო მიხეილ სააკაშვილის ჩამოყვანა და შემოპარება უცხო ქვეყნის სადაზვერვო სამსახურების მიერ 2021 წელს, მანამდე კონსულტაციებით ბრიუსელსა და ვაშინგტონში. საბოლოო ჯამში საქართველოს უნდა ეთამაშა მეორე ფრონტის როლი, რომ ხარჯთეფექტური ყოფილიყო ევროკავშირის დაცვა და ჩვენ აქ გვეომა, გაგვეჩერებინა რუსი ჯარისკაცები, როცა სხვები სემინარებზე და დისკუსიებზე დასხდებოდნენ და მშვიდად ისაუბრებდნენ ჩვენს ბედზე. ტაშს დაგვიკრავდნენ და წითელ ხალიჩებს დაგვიგებდნენ, მაგრამ წითელ ხალიჩაზე გამვლელიც აღარ დარჩებოდა“, - აღნიშნა პაპუაშვილმა.