ვოლსკი: საქართველოს მხრიდან „მეგობარი აქტის“ მომზადების პროცესში ჩართული არიან ძირითადად ის ადამიანები, რომლებიც წარმოადგენენ „ნაცმოძრაობას“, რომელთა ლიდერები ტრამპს და სხვა საკვანძო ფიგურებს უწოდებდნენ რუსეთის აგენტებს

ამერიკის ეროვნული თავდაცვის ავტორიზაციის აქტში „MEGOBARI აქტის“ დამატების დაბლოკვა მოსალოდნელი იყო - აცხადებენ „ქართულ ოცნებაში“.

გამოცემა The Hill წყაროებზე დაყრდნობით წერს, რომ ეროვნული თავდაცვის ავტორიზაციის აქტში „MEGOBARI აქტის“ დამატება წარმომადგენელთა პალატის სპიკერის, მაიკ ჯონსონის ინიციატივა იყო. ბოლო სამი თვის განმავლობაში სენატის უმრავლესობის ლიდერმა ჯონ ტუნიმ აღნიშნული თხოვნა უკვე მეორედ დაბლოკა.

„ეს ხელისუფლება მარიონეტული ხელისუფლებით უნდა შეიცვალოს, ამას ემსახურება ეს ე.წ. მეგობარი აქტი. დაბლოკვა უმრავლესობის მიერ ეს რასაკვირველია არ მოხდებოდა ისე, რომ არ იყოს ეს შეთანხმება უმრავლესობის სხვა წევრებთან. საქართველოს მხრიდან მეგობარი აქტის მომზადების პროცესში ჩართული არიან ძირითადად ის ადამიანები, რომლებიც წარმოადგენენ „ნაცმოძრაობას“, რომელთა ლიდერები სულ ახლახან ტრამპს და სხვა საკვანძო ფიგურებს უწოდებდნენ რუსეთის აგენტებს.

ზუსტად იციან ამის თაობაზე ამერიკის შეერთებული შტატების სენატშიც, შესაბამის სამსახურებშიც და დღეს ის ადამიანები პოზირებენ ფოტოებში ჯო უილსონთან ერთად და ამერიკის შეერთებული შტატების ახალი ადმინისტრაციის მოკავშირედ წარმოადგენენ თავს.

პატარა საქართველოს უტევს არა ჯანსაღი ძალა და სამწუხაროდ ეს ძალა მხარდაჭერილია ბრიუსელიდან. ვფიქრობ, ანალოგიური მხარდაჭერა აღარ ექნებათ ამერიკის შეერთებული შტატების ახალი ადმინისტრაციიდან“, - აცხადებს საქართველოს პარლამენტის თავმჯდომარის პირველი მოადგილე გიორგი ვოლსკი.