ზუკა რურუა რადიკალებზე: ჩვენ დავინახეთ ჟურნალისტების მიმართაც ბულინგი, როგორ ამუნათებენ, შეურაცხყოფებს აყენებენ. ორმაგი სტანდარტი მოქმედებს აქაც - სხვას აბრალებენ ძალადობას და თავად უარეს ქმედებას სჩადიან

ჩვენ დავინახეთ ჟურნალისტების მიმართაც ბულინგი, როგორ ამუნათებენ, შეურაცხყოფებს აყენებენ. ორმაგი სტანდარტი მოქმედებს აქაც - სხვას აბრალებენ ძალადობას და თავად უარეს ქმედებას სჩადიან, - განაცხადა „დღის ქრონიკაში“ საპარლამენტო უმრავლესობის წევრმა, ზუკა რურუამ ქუჩის აქციებზე საუბრისას.

მისივე თქმით, ბოლო დღეებში საზოგადოებამ ნათლად დაინახა, თუ როგორ უნდათ რადიკალებს, შექმნან დესტაბილიზაცია და მოუწოდონ ხალხს გამოსვლისკენ, არეულობისკენ.

„მათი მიზანია გამოწვევა, რომ თითქოსდა, ამ ქვეყანაში რაღაც დუღილი შექმნან, მაგრამ რა თქმა უნდა, ქართველი ხალხი ბრძენია, ყველა ნათლად აანალიზებს ამ ყველაფერს და ეს პროვოკაციები წარსულს ჩაბარდა. დარწმუნებული ვარ, ჩვენი ყველა მომხრე, თანამებრძოლი, ასევე, ქართული საზოგადოება ამას კარგად იაზრებს და ამ პროვოკაციებს ნამდვილად არ ავყვებით.

ჩვენ დავინახეთ ჟურნალისტების მიმართაც ბულინგი, როგორ ამუნათებენ, შეურაცხყოფებს აყენებენ. ორმაგი სტანდარტი მოქმედებს აქაც - სხვას აბრალებენ ძალადობას და თავად უარეს ქმედებას სჩადიან. ამდენად, ამას მათ მორიგ სპეკულაციად შევაფასებდი ამ თემასთან დაკავშირებით“, - განაცხადა რურუამ.

მისივე განმარტებით, ქუჩის აქციების დროს უსიამოვნო ფაქტები, თავის ვერ შეკავება ორივე მხრიდან იყო. რურუამ აღნიშნა, რომ დაპირისპირებული მხარის წარმომადგენლები სიტყვიერ შეურაცხყოფაზე, გინებაზე გადმოდიოდნენ, რაზეც თავის შეკავება ძალიან რთულია.