ჰქონდა თუ არა, საქართველოს საკონსულოს იტალიაში, ქართველი "დამსაქმებლის" ლიკა გალუსტაშვილის შესახებ ინფორმაცია, რომელსაც ქართველი ემიგრანტები ერთგვარ "ტრეფიკინგში" და არაადამიანურ მოპყრობაში ედავებიან

რამდენიმე დღეა, ExclusiveTV.ge მუშაობს თემაზე, რომელიც იტალიაში „დამსაქმებლის ინსტიტუტს“ და ამ „ინსტიტუტის“ დაუწერელ კანონებს ეხება, რომლის მსხვერპლიც წლების განმავლობაში არაერთი ქართველი ემიგრანტი გამხდარა. შიშის, თუ უიმედობის გამო, რომ არსებულ რეალობას ვერ შეცვლიან, ეს ადამიანები ხშირად ჩუმად ყოფნას ამჯობინებენ, მაგრამ ამჯერად, ქართველი ემიგრანტების ერთმა ჯგუფმა ხმამაღლა საუბრის გადაწყვეტილება მიიღო. ბრალდებების მართებულობას, პოლიცია და გამოძიება გაარკვევს, რადგან ემიგრანტებს ოფიციალური საჩივრის შეტანა აქვთ გადაწყვეტილი. სანამ ოფიციალური გამოძიება დაიწყება, გადავწყვიტეთ ამ ადამიანებისთვის პლატფორმა დაგვეთმო. მედიამაუწყებლის ვებსაიტზე გამოქვეყნდა სტატია, სადაც იტალიაში მცხოვრები ქართველი ემიგრანტების ზემოთ აღნიშნული ჯგუფი, რომში მცხოვრებ ქართველ „დამსაქმებელს“ ლიკა გალუსტაშვილს ერთგვარ „ტრეფიკინგში“ და არაადამიანურ მოპყრობაში ადანაშაულებს.

ჩვენ ვესაუბრეთ რამდენიმე ემიგრანტ ქალბატონს, მოვისმინეთ მათი პრეტენზიები და ბრალდებები, რის შემდეგაც დავუკავშირდით ლიკა გალუსტაშვილს, რომელმაც ეს ბრალდებები უარყო. მეტიც, ჩვენთან საუბრისას განაცხადა, რომ მისმა იტალიელმა საქმიანმა პარტნიორმა მონიკამ, ამ ჯგუფის ორი წევრის წინააღმდეგ, პოლიციაში საჩივარი დაწერა, რომლის ასლსაც აუცილებლად გამოგვიგზავნის.

თემაზე მუშაობის პროცესში ვესაუბრეთ კიდევ ერთ პიროვნებას, ქალაქ ლივორნოში მცხოვრებ ქალბატონ ხათუნა გურჩუა, რომელმაც „დამსაქმებლებისგან“ დაზარალებული ემიგრანტების ისტორიების შესახებ, რამდენიმე დღის წინ ელექტრონული ფოსტით, წერილი გაუგზავნა იტალიაში საქართველოს საკონსულოს და მიიღო საპასუხო წერილი, სადაც საკონსულოს წარმომადგენელი ბრალდების ობიექტის ვინაობას და ამბის დამადასტურებელ ინფორმაციას ითხოვდა. ქალბატონმა ხათუნამ, როგორც ჩვენთან საუბარში აღნიშნა, საკონსულოს გარკვეული ინფორმაცია გადაუგზავნა.

ExclusiveTV.ge იმავე დღეს დაუკავშირდა საქართველოს კონსულს იტალიაში ნატალია კორძაიას, რომელმაც აღნიშნა, რომ ერთი კვირის წინ, საკონსულოში შევიდა ზოგადი, გულისტკივილით დაწერილი ი-მეილი, რაზედაც საკონსულოს წარმომადგენელმა უპასუხა, რომ მიეწერათ კონკრეტული ფაქტები და ვის ეხებოდა საკითხი. რის შემდეგაც მეორე მხრიდან იყო პასუხი, რომ აგროვებს მასალებს, რათა გადასცეს საკონსულოს.

კონსულის განცხადებით, აღნიშნულ მიმოწერაში ლიკა გალუსტაშვილი არ ფიგურირებდა. ასევე, საკონსულოში შესულ ერთ-ერთ იმეილში საუბარი იყო კალაბრიაზე და არა რომზე. კონსულმა ჩვენთან საუბრისას განაცხადა, რომ ახლა უკვე როდესაც საქმის კურსშია, აუცილებლად მიადევნებს თვალს აღნიშნულ ამბავს და თუ ადგილი აქვს სამართალდარღვევის ფაქტს ამ შემთხვევაში რეკომენდაციაა მიემართოს სამართალდამცავ ორგანოებს.

ჩვენ, ExclusiveTV.ge-ს ჟურნალისტები, განვაგრძობთ თემაზე მუშაობას და ღია ვართ კომუნიკაციისთვის. ჩვენ ჟურნალისტური ეთიკისა და პროფესიული ბალანსის დაცვით, აუცილებლად გავაშუქებთ ნებისმიერ პრობლემატურ თემას, რომელიც ემიგრანტების უფლებების დარღვევას და ხელყოფას ეხება.

პ.ს. სტატიას ფოტო მასალის სახით ერთვის ლიკა გალუსტაშვილის ფოტო.

ამავე თემაზე:

📌 ქართველი ემიგრანტები ქართველ "დამსაქმებელს" და მის იტალიელ პარტნიორს “ტრეფიკინგსა” და არაადამიანურ მოპყრობაში ადანაშაულებენ, იტალიელმა დამსაქმებელმა კი მათ ბულინგისა და ცილისწამების გამო უჩივლა