ეკუთვნის თუ არა, სამუშაო კონტრაქტის გარეშე მომუშავე "ბადანტეს" მეცამეტე ხელფასი და როგორ უნდა გამოითვალოთ, რა თანხა გეკუთვნით

მეცამეტე ხელფასი ეს არის წლიური დამატებითი ანაზღაურება, რომელსაც დამსაქმებელი, სამუშაო სფეროს მიუხედავად, ყველა დასაქმებულ პირს უხდის. იგივე ხდება ოჯახში დასაქმებული პერსონალის შემთხვევაშიც, მაგალითად როგორიცაა მოხუცის მომვლელი, იგივე "ბადანტე". "ბადანტეს" მეცამეტე ხელფასი ეკუთვნის მიუხედავად იმისა, მას უვადო სამუშაო კონტრაქტი აქვს გაფორმებული, თუ ვადიანი, სრულ განაკვეთზე მუშაობს, თუ ნახევარ განაკვეთიან სამუშაოზე.

როგორ გამოითვლება მეცამეტე ხელფასი?

პირველ რიგში აღვნიშნოთ ის, რომ მეცამეტე ხელფასის ანაზღაურება, წლის ბოლოს, დეკემბერში, ან სამუშაო კონტრაქტის დახურვის მომენტში, ანგარიშსწორებისას ხდება. "ბადანტის" მეცამეტე ხელფასი, მისი ყოველთვიური ანაზღაურების ერთი მეთორმეტედია. მაგალითად, თუ ხელფასი შეადგენს 800 ევროს, თვეში გამოდის 66.66 ევრო, რომელიც აკუმულირდება და წლის ბოლოს, ან როგორც აღვნიშნეთ სამუშაო კონტრაქტის დახურვის მომენტში, პირს მთლიანი თანხა გადაეცემა. უნდა აღვნიშნოთ ისიც, რომ ორმხრივი შეთანხმების საფუძველზე, დამსაქმებელმა მეცამეტეს თანხა, შესაძლოა გადაანაწილოს და ეტაპობრივად, ხელფასთან ერთად გადაუხადოს დასაქმებულს.

მაგრამ რა ხდება იმ შემთხვევაში, თუ "ბადანტე" სამუშაო კონტრაქტის გარეშე, "შავად" მუშაობს ოჯახში, ეკუთვნის თუ არა მას, მეცამეტე ხელფასი?

კითხვაზე პასუხი გახლავთ - დიახ, ეკუთვნის!

მაგრამ როგორ უნდა მოვიქცეთ, თუ დამსაქმებელს არ სურს გადახდა? ამ შემთხვევაში, დასაქმებულმა პირმა უნდა იმოქმედოს. პირველ რიგში, მან დამსაქმებელს უნდა გაუგზავნოს მოთხოვნის წერილი, უმჯობესია, თუ ეს იქნება დაზღვეული წერილი, მიღება/ჩაბარების ქვითრით (Raccomandata), ან სერტიფიცირებული ელექტრონული ფოსტის (PEC) საშუალებით, სადაც "ბადანტე" ხაზგასმით აღნიშნავს მის მიერ ნამუშევარი თვეების რაოდენობას. ბუნებრივია, დასაქმებულს უნდა ჰქონდეს რაიმე დამადასტურებელი, რომ მან ნამდვილად იმუშავა აღნიშნულ ოჯახში.

თუ ამან შედეგი არ გამოიღო, დასაქმებულმა უნდა მიმართოს "პროფკავშირებს", ან შრომითი ინსპექციის სამსახურს. ასეთ დროს, ძირითად შემთხვევაში, დამსაქმებელი იხდის დავალიანებას. თუ ამ შემთხვევაშიც ვერ მოხდა შეთანხმება, დასაქმებულს შეუძლია შრომითი უფლებების საკითხზე მომუშავე მოსამართლეს მოსთხოვოს განკარგულების გაცემა, რომელიც დამსაქმებელს დავალიანების დაფარვას დაავალდებულებს. ამ პროცედურის გავლის შემდეგ, "ბადანტეს" ასევე უფლება ეძლევა მოითხოვოს უმუშევრობის დახმარება "Disocupazione".

შეგახსენებთ, რომ მეცამეტე ხელფასის დავალიანების კანონით მოთხოვნის ვადა არის 3 წელი.