Italian design days - იტალიური დიზაინი კვლავ საქართველოშია!

იტალიური დიზაინი კვლავ საქართველოშია! 

30-31 მაისს, თბილისში, ზურაბ წერეთლის თანამედროვე მუზეუმში საქართველოში იტალიის საელჩოსა და იტალიის საგარეო ვაჭრობის ხელშეწყობის სააგენტოს (ITA) ორგანიზებით, იტალიური დიზაინისა და არქიტექტურის პოპულარიზაციასთან დაკავშირებული ტრადიციული ყოველწლიური ღონისძიება გაიმართა.

საქართველოში იტალიის ელჩმა ენრიკო ვალვომ და საქართველოს რეგიონული განვითარებისა და ინფრასტრუქტურის მინისტრმა ირაკლი ქარსელაძემ ერთობლივად გახსნეს სამი გამოფენა, რომელთა ნახვაც დამთვალიერებლებს 2022 წლის 3 ივნისამდე შეეძლოთ.

პროექტის მიზანია საქართველოში იტალიური დიზაინის ცნობადობის ამაღლება და ხელმისაწვდომობა, შესაბამისი დარგების წარმომადგენლებს შორის კავშირების გაძლიერება და ამ სფეროებში საქართველოსთან მრავალმხრივი თანამშრომლობის ხელშეწყობა.

როგორც ExclusiveTV-თან საუბრისას საქართველოში იტალიის ელჩის მოადგილე ნიკოლა იორიომ განაცხადა - “იტალიის არქიტექტორთა ეროვნულ საბჭოსთან ერთად მომზადებული ექსპოზიცია უკავშირდება დიზაინის დღის მთავარ თემას „რე@გენერაცია: დიზაინი და ახალი ტექნოლოგიები მდგრადი მომავლისთვის“. ჟურნალი „Domus“-ის ქართული გამოცემა, რომელიც ამ ჟურნალის პირველი და ერთადერთი გამოცემაა აღმოსავლეთ ევროპასა და ევრაზიაში, დამთვალიერებელს შესთავაზებს გამოფენას „შესაძლოა თუ არა ისტორიის და მომავლის კოჰაბიტაცია?“ 

საქართველოში იტალიის ელჩმა ენრიკო ვალვომ ღონისძიების ფარგლებში გამართული კონკურსის შესახებაც ისაუბრა: "გამოცხადდა იტალიის საელჩოსა და დიზაინის ევროპული ინსტიტუტის (IED) მიერ ჩატარებულ კონკურსში „When Italian Design Meets Georgian Creativity" გამარჯვებული ახალგაზრდა ქართველი დიზაინერების ვინაობა და გაიმართა მათი საავტორო პროექტების ექსპოზიცია". პირველი პრემიის სახით, გამარჯვებულმა ავტორმა მიიღო დიზაინის ევროპული ინსტიტუტის სტიპენდია IED-ის იტალიის ერთ-ერთ ფილიალში სასწავლებლად. მეორე პრემია გულისხმობს დიზაინის ევროპული ინსტიტუტის მიერ შეთავაზებულ ონლაინ კურსს „Smart Creativity“, ხოლო იტალიის საელჩო საქართველოში გასცემს ჟიურის "სპეციალურ პრემიას.”

წლევანდელი გამარჯვებულები არიან: ანი ფერიაშვილი, რომელიც დაჯილდოვდა პირველი პრიზით, ნინო დაფქვიაშვილი - მეორე პრიზით და თიკა შელია "ჟიურის პრიზით".

31 მაისს გაიმართა ვორქშოპი, რომელშიც მონაწილეობა მიიღეს არქიტექტურისა და დიზაინის დარგებში მომუშავე ისეთი კომპანიებისა და სამეცნიერო წრეების წარმომადგენლებმა, როგორიცაა: ფლორენციის უნივერსიტეტი, მილანის პოლიტექნიკური უნივერსიტეტის მიერ დაარსებული ცენტრი „Poli.design“, თბილისის სახელმწიფო სამხატვრო აკადემია, თბილისის არქიტექტურის, დიზაინისა და კრეატიული ინდუსტრიების ცენტრი, დიზაინის ევროპული ინსტიტუტი და ჟურნალი „Domus-საქართველო“.

ნინა მამუკაძე