იტალიაში მცხოვრები ქართველი ქალი პოლიციამ დაკითხა, მას არალეგალური მიგრაციის ხელშეწყობაში ედავებიან

რამდენიმე დღის წინ, გავრცელდა ინფორმაცია, რომ იტალიის ქალაქ ემპოლში მცხოვრები ქართველი ქალი პოლიციამ დაკითხა, ხოლო საცხოვრებელი, რომელიც მას ქირით ჰქონდა აღებული, გაჩხრიკეს. ნაპოვნი ნივთების შესახებ პოლიცია დეტალურ ინფორმაციას არ ასაჯაროებს, თუმცა, ცნობილი ხდება, რომ აღნიშნულ პიროვნებას დანაშაულებრივ სქემასთან კავშირს ედავებიან, რომელიც არალეგალური მიგრაციისა და დასაქმების ხელშეწყობას ეხება. აღნიშნულთან დაკავშირებით, ადგილობრივმა ტელევიზიამ სიუჟეტიც მოამზადა, საიდანაც ვიგებთ, რომ იტალიის, ქალაქ სიენას ფინანსურმა პოლიციამ, სამი პირი დააკავა, სამივე იტალიური ეროვნების, რომლებიც მიმალვას აპირებდნენ. გამოძიების მიხედვით ირკვევა, რომ აღნიშნულ პირებს დანაშაულებრივი სქემა ჰქონდათ შემუშავებული, რომლის საშუალებითაც მიგრანტებს ფიქციურ მომსახურებას უწევდნენ თანხის სანაცვლოდ. თანხა 50-იდან 4000 ევრომდე მერყეობდა. ყველა მიგრანტი „ბადანტე“ გახლავთ.

ფინანსური პოლიციის კომენტარი: „სიტუაციამ უფრო ფართო ხასიათი მიიღო, როდესაც გაირკვა, რომ საქმეში კიდევ ორი სუბიექტი ფიგურირებდა, აქედან ერთი წარმოშობით ქართველია, რომელსაც სიენას პროვინციაში "არანამდვილი ბადანტეების" გადმოყვანის ფუნქცია ჰქონდა, თუმცა ქალაქ ემპოლსა და მის მოსაზღვრე ქალაქებში ლეგალურად დასაქმებულებიც ფიქსირდებიან, ხოლო მეორე პირი - იტალიელია და მას სუბიექტების ადგილზე გადანაწილების ფუნქცია ჰქონდა შეთავსებული.ოპერაციამ რეგიონის არაერთი მხარე მოიცვა, ჩატარდა ჩხრეკა და კონტროლი, ქირურგიული სიზუსტით, რამდენადაც ეს გამოძიების ამ ეტაპზე იყო შესაძლებელი. სამწუხაროდ, მიგრაცია, რომელიც თავისთავად მტკივნეული თემაა, ამ შემთხვევაში ბიზნესის წყაროც გახდა.“

ჯამში საუბარია 347-ზე მეტ ადამიანზე. მათი უმრავლესობა ნიგერიელია და მათგან მხოლოდ 58 მუშაობდა რეალურად. ოპერატიული ბაზა ვალდიკიანას ასოციაცია გახლდათ, რომელიც ოფიციალურად  მოქალაქეთა მომსახურების ცენტრია. წაყენებულ ბრალდებებს შორის არის არალეგალური მიგრაციის ხელშეწყობის ბრალდება. სამივე დაკავებული ამჟამად შინაპატიმრობაში იმყოფება, დანარჩენები დაიკითხნენ.

ExclusiveTV თემაზე მუშაობას განაგრძობს.