„სანატორია 2020“ - რა ეტაპზეა საბუთების განხილვა

2020 წელს გამოსული „სანატორიის“ საფუძველზე იტალიაში ბინადრობის ნებართვის (Permesso di soggiorno) მისაღებად განაცხადი 230 000-მა არალეგალმა უცხოელმა გააკეთა. 2021 წლის აგვისტოს მონაცემებით, ჯერ მხოლოდ 60 000 ბინადრობის ნებართვაა გაცემული, მთლიანი რაოდენობის მხოლოდ 26%. პროცესი შედარებით დაჩქარდა მიმდინარე წლის თებერვლიდან. მანამდე კი, კანონის გამოსვლიდან თებერვლამდე, საქმეების მხოლოდ 5% იყო განხილული.

განსაკუთრებით რთული სიტუაციაა დიდ ქალაქებში. მაგალითად, მილანში, 26 000 მოთხოვნიდან, მხოლოდ 2000-ია დაკმაყოფილებული, რომი - 16 000-დან მხოლოდ 60, ტურინი -  5000-დან 760, ნეაპოლი - 17 500-დან 641, კაზერტა - 3700-დან 285. შედარებით უკეთესი სიტუაციაა შემდეგ ქალაქებში: ბარი - 4150-დან 2000, ბოლონია - 3884-დან 2177, რეჯო-კალაბრია  - 2000-დან 950, მაგრამ ზოგადი სურათი მაინც კრიტიკულია.

უკეთესი მდგომარეობაა „სანატორიით“ განსაზღვრული იმ საქმეების განხილვის მხრივ, რომლებიც დროებითი ბინადრობის ნებართვის მოთხოვნით, საფოსტო გზავნილის, ე.წ. KIT-ის საშუალებით გაიგზავნა. 13 000 განაცხადიდან დადებითად დასრულდა 9942 საქმე, 1500-ს უარი ეთქვა, დანარჩენი განხილვის პროცესშია.

ეს ყველაფერი ათიათასობით უცხოელს დაბრკოლებებს უქმნის როგორც სამუშაო, ასევე სოციალურ ინტეგრაციაში და აგრეთვე სრულყოფილი სამედიცინო მომსახურების მიღებაში. განსაკუთრებით კი იმ სიტუაციაში, რომელშიც ამჟამად ვიმყოფებით. ბევრ, საბუთების მომლოდინე არალეგალს, პრობლემა შეექმნა ვაქცინაციისა და Green pass-ის მიღების მხრივ, მიუხედავად იმისა, რომ კანონი მათ ამის საშუალებას აძლევდათ.

განაცხადების განხილვის დაგვიანების ერთ-ერთი მიზეზი პრეფექტურებში პერსონალის ნაკლებობა გახლდათ. 800 თანამშრომელი, რომელთაც საქმიანობა გასული წლის მაისში უნდა დაეწყოთ, თითქმის ერთი წლის დაგვიანებით, მიმდინარე წლის მარტი-მაისის პერიოდში შევიდნენ პრეფექტურებში, რის შედეგადაც საქმეების განხილვის პროცესი დაჩქარდა. თუმცა, მათი კონტარქტები მხოლოდ ექვსთვიანია. იმედი ვიქონიოთ, რომ შინაგან საქმეთა მინისტრი, კონტრაქტების გახანგრძლივების ბრძანებას ხელს მოაწერს, რაც ავტომატურად აისახება ბინადრობის ნებართვის საქმეების განხილვის ვადების დაჩქარებაზეც.

მოამზადა ნინა მამუკაძემ