საშობაო ტრადიციები იტალიაში

თუ  დეკემბერში  იტალიაში მოგზაურობას გადაწყვეტთ, შეამჩნევთ, რომ სხვა ქვეყნებთან შედარებით აქ, ბევრად ადრე იწყება საშობაო მზადება.

მათი სადღესასწაულო სეზონი ოფიციალურად  8 დეკემბერს იხსნება  და  6 იანვარს, შობიდან მე-12 დღეს სრულდება.

საშობაოდ განათებულ, მორთულ ქუჩებში, მრავალ ეკლესიასა და პიაცაზე (მოედანზე)  გამოფენილია პრესეპი (შობის სცენები). ორნამენტული ხელოვნების ნიმუში, რომელიც  ხელით იქმნება.  ტრადიციის თანახმად, იტალიელები  რელიგიური დღესასწაულის წინა დღეს არ ჭამენ ხორცს, როგორც წესი,  მიირთმევენ სხვადასხვა თევზის კერძებს. თევზის გარდა, რა თქმა უნდა, იტალიელების საყვარელი კერძია მაკარონი.

საშობაო სუფრას,  ტრადიციულად ყველა ოჯახში  ამშვენებს  საშობაო ტკბილეული Pandoro, ვარსკვლავისებური ფორმის, ტკბილი, საშობაო პური.

სახელწოდება pan d'oro ნიშნავს "ოქროს პურს„ შუა საუკუნეებში,  თეთრი პური ძვირი ღირდა და  მას მხოლოდ მდიდრები მიირთმევდნენ.  ვერონაში, ოჯახები ფულს აგროვებდნენ, რათა თეთრი პური ეყიდათ. ასე დაიწყო ვერონიდან პანდოროს ისტორია.

შობის დღესასწაულისთვის დიდი თუ პატარა  განსაკუთრებულად ემზადება. ეს არის მეგობრების, ნათესავების და ახლობლების შეკრების დღე და დიდი ზეიმი ყველასთვის.

6 იანვარს ნათლისღების დღესასწაულს  და ასევე  პატარებისთვის საყვარელ, La Befana-ს დღეს აღნიშნავენ. 

ბეფანა  ეს არის  უცნაური, შეუხედავი ჯადოქარი, რომელსაც  პატარები მოუთმენლად ელიან და სჯერათ, რომ  5 იანვარს ღამით, ბეფანა  ოჯახებს ჩუმად სტუმრობს,  მისთვის განკუთვნილ ნუგბარს  ჭიქა ღვინოსთან ერთად მიირთმევს  და  სანაცვლოდ, იმ ბავშვებს რომლებიც კარგად იქცეოდნენ, ტკბილეულით სავსე წინდებს უტოვებს, ხოლო დანარჩენებს - ნახშირსა.

ამ ყველაფრის მიუხედავად, არ დაგავიწყდეთ, რომ ეს იტალიაა მოულოდნელობით, მრავალფეროვნებით, თავგადასავლებით სავსე ფერადი ქვეყანა და მოგზაურობისთვის წელიწადის ნებისმიერი დრო შესაფერისად ითვლება.

ელენე ფერაძე