14 წელი 2008 წლის აგვისტოს ომიდან - რუსეთის აგრესიას საქართველოს 412 მოქალაქე შეეწირა, 1747 ადამიანი კი დაშავდა

14 წლის წინ, რუსული ბომბების გამო საკუთარი სახლ-კარი და მიწა 130 ათასმა ადამიანმა დატოვა. ზოგი მოგვიანებით დაბრუნდა, თუმცა 30 ათასამდე  მათგანი კვლავ იძულებით გადაადგილებული პირია. 2008 წელს,  შეიარაღებული კონფლიქტი საქართველოსა და რუსეთს შორის ხუთ დღეს გაგრძელდა.

ამ ომს საქართველოს 412 მოქალაქე შეეწირა, 1747 ადამიანი კი  დაიჭრა. მათ შორის იყვნენ სამოქალაქო პირები,  ჟურნალისტები.

დე ფაქტო რეჟიმების მიერ კონტროლირებადი ტერიტორიების გარდა, რუსმა სამხედროებმა დაიკავეს ხეობები, დიდი ქალაქები და სოფლები საქართველოს სამ რეგიონში.

სამხედრო დაპირისპირება საერთაშორისო თანამეგობრობის ჩართულობით შეწყდა.  გაფორმდა შეთანხმება  ცეცხლის შეწყვეტის შესახებ, რომელსაც მოსკოვი დღემდე არ ასრულებს და არ ახდენს საქართველოს ტერიტორიების დეოკუპაციას.

12 წლის შემდეგ, საქართველომ ადამიანის უფლებათა ევროპულ სასამართლოში დავა მოუგო ჩრდილოელ მეზობელს  და ამ ომში

რუსეთის ბრალეულობა დაამტკიცა. ქართულმა მხარემ სტრასბურგში 700-მდე მტკიცებულება წარადგინა. მათ შორის,  გორში აფეთქებული რაკეტის, „ისკანდერის“ ნაწილები და მათზე ჩატარებული ექსპერტიზის დასკვნა.

აგვისტოს ომის შემდეგ რუსეთმა საქართველოს ორი რეგიონის, აფხაზეთისა და სამხრეთი ოსეთის დამოუკიდებლობა აღიარა, მაგრამ საერთაშორისო საზოგადოება საქართველოს ტერიტორიული მთლიანობის მხარდამჭერად რჩება.

2008 წლის 12 აგვისტოს გაფორმდა ცეცხლის შეწყვეტის შეთანხმება, რომელსაც რუსეთი ამ დრომდე არღვევს. 6-პუნქტიანი გეგმა, მათ შორის, იმასაც გულისხმობს, რომ საქართველოს შეიარაღებული ძალები უნდა დაბრუნდნენ მათი ჩვეულებრივი დისლოკაციის ადგილებში; თუმცა, რუსეთის საოკუპაციო რეჟიმის გამო ეს ვერ ხერხდება. რუსეთი აგრძელებს მცოცავ ოკუპაციას, ავლებს მავთულხლართებს, იტაცებს მიწებს, მოსახლეობის საქონელს და თავად ადამიანებსაც. 

დღეს, საქართველოს ტერიტორიების 20% კვლავ ოკუპირებულია რუსეთის მიერ, მავთულხლართები კი ყოველდღიურად მრავლდება.

ასევე დაგაინტერესებთ:

🔵  ვინ არის ქართველი მსახიობი, რომელიც ძალიან პოპულარულ თურქულ სერიალში მთავარ როლს შეასრულებს

🔵 „სიცოცხლე არაპროგნოზირებადია, ერთ წამს ვარსებობთ, მეორეს კი გავქრებით...“- რას წერს ფადი ასლი

🔵 ანა ჩაკვეტაძე პირველი ქართველი ქალი ოფიცერია, რომელიც FBI-ს აკადემიაში ისწავლის