დავით მათიკაშვილი ოპოზიციაში არსებულ დაპირისპირებაზე: ეს არის ის დაჯგუფება, ვის მიმართაც საზოგადოებას საერთოდ არ გააჩნია ნდობა. სწორედ ეს არის საფუძველი იმისა, რაც მეათედ შექმნილ „ფანჩატურში“ ხდება და რომელიც მათ თავზე ენგრევათ

ეს არის ის დაჯგუფება, ვის მიმართაც საზოგადოებას საერთოდ არ გააჩნია ნდობა. სწორედ ეს არის საფუძველი იმისა, რაც მეათედ შექმნილ „ფანჩატურში“ ხდება და რომელიც მათ თავზე ენგრევათ, - განაცხადა საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილმა ოპოზიციაში არსებულ დაპირისპირებასთან დაკავშირებით.

მისი თქმით, ამ ოპოზიციურ გაერთიანებას ისეთივე ფიასკო ელის, როგორც ეს წინა შემთხვევებში იყო.

„სრული უნიათობა შეგვიძლია ერთი სიტყვით ვუწოდოთ იმას, რაც ხდება დღეს რადიკალურ ოპოზიციაში. ეს არის ის დაჯგუფება ადამიანების, ვის მიმართაც საზოგადოებას საერთოდ არ გააჩნია ნდობა. სწორედ ეს არის პლაცდარმი, საფუძველი იმისა, რაც რეალურად მეათედ შექმნილ „ფანჩატურში“ ხდება და რომელიც მათ თავზე ენგრევათ. თითს იშვერენ ერთმანეთის მიმართ. აბრალებენ საკუთარ უნიათობას. პოლიტიკური მდგენელის აუცილებელი შემადგენელი ნაწილი არის ჩვენი საზოგადოების ნდობა და მხარდაჭერა. უამრავ სისაძაგლეს სჩადიოდნენ საკუთარი ერის მიმართ. როგორ წარმოგიდგენიათ, მათ საზოგადოებამ მხარი დაუჭიროს. ამიტომაც ბუნებრივია, რომ ეს კიდევ ერთი უშედეგო მცდელობა ფიასკოთი დასრულდება“, - განაცხადა დავით მათიკაშვილმა.

ოპოზიციაში ოპოზიციის კრიტიკა გრძელდება. მიხეილ სააკაშვილმა სასამართლო პროცესზე გააკეთა პოლიტიკური განცხადებები და კოლეგებს ბრძოლის სტრატეგია დაუწუნა. ასევე, მსჯავრდებული ნიკა მელიას წერილს გამოეხმაურა და თქვა, რომ ვერაფერი გაიგო, გარდა იმისა რომ მელიას ის არ მოსწონს. ალიანსის დატოვების მომხრეა „ნაციონალური მოძრაობის“ ნაწილი. საბოლოო გადაწყვეტილება ჯერ უცნობია.