კობიაშვილი ეროვნული ნაკრების მიმართ ბულინგის კამპანიაზე: ეს არის ჯგუფი, რომლებსაც არც ჩვენი ეროვნული ნაკრები აინტერესებთ და არც ქვეყნის წარმატება უხარიათ - ცდილობენ, ნებისმიერი წარმატება ნეგატიურ დღის წესრიგში გადაიყვანონ

საქართველოს ეროვნული ნაკრების ფეხბურთელების წინააღმდეგ შეტევას და მიზანმიმართულ ბულინგის კამპანიას, „ქრონიკასთან“ საქართველოს ფეხბურთის ფედერაციის პრეზიდენტი, ლევან კობიაშვილი ეხმიანება. როგორც მან აღნიშნა, ეს არის მავნებლური ადამიანების ჯგუფი, რომლებიც მიზანმიმართულად ცდილობენ ნებისმიერი წარმატება ნეგატიურ დღის წესრიგში გადაიყვანონ.

„ეს არის ჯგუფი, რომლებსაც არც ჩვენი ეროვნული ნაკრები აინტერესებთ, არც ნაკრების მოთამაშეები და ზოგადად, არც ქვეყნის წარმატება უხარიათ. მათ აქვთ კონკრეტული მიზანი და შეიძლება ითქვას დავალებები, რომლებსაც ახორციელებენ. საბედნიეროდ, ასეთი ადამიანები ცოტანი არიან, არიან დიდი რაოდენობის ნამდვილი გულშემატკივრები, რომლებიც მიუხედავად რთული პერიოდისა, ყოველთვის იქცევიან ღირსეულად, ისე როგორც როგორც უნდა იქცეოდეს ნამდვილი გულშემატკივარი“, - აღნიშნა ლევან კობიაშვილმა.

საქართველო-ესპანეთის მატჩის შემდგომ ეროვნული ნაკრების ფეხბურთელების მისამართით ბულინგის მორიგი კამპანია დაიწყო.

საქართველოს ეროვნული ნაკრების ფეხბურთელების წინააღმდეგ შეტევას და მიზანმიმართულ ბულინგის კამპანიას, მიხეილ სააკაშვილი რუსთავის ციხიდან შეუერთდა.

„ვუყურებ რა ნაკრების უბედურებას - ეს არის პირდაპირი შედეგი მოთამაშეთა უმრავლესობის ხალხისგან მოწყვეტის“, - წერს მსჯავრდებული სოციალურ ქსელში.