ლევან მაჭავარიანი: ველოდებოდით რაღაც ტიპის გზავნილებს ჩვენი მისამართით, რომელიც რატომღაც იგვიანებს. ჩვენ გაჟღერებული გვაქვს, თუ რა ნაბიჯებია გადასადგმელი, რომ ურთიერთობები აშშ-თან აღდგეს და რეალური პარტნიორობა დაიწყოს

„არის აბსოლუტური დუმილი. რა თქმა უნდა, ჩვენ ვრჩებით სტრატეგიული მოლოდინის რეჟიმში, თუმცა კითხვის ნიშნები არსებობს, ვინაიდან უკვე ძალიან დიდი ხანია, რაც ვერანაირი კონკრეტიკა ვერ გავიგეთ საქართველოსთან მიმართებაში“, - განაცხადა პარლამენტის ფრაქცია „ქართული ოცნების“ თავმჯდომარის პირველმა მოადგილემ, ლევან მაჭავარიანმა აშშ-ზე საუბრისას.

იგი გამოეხმაურა ამერიკის შეერთებული შტატების ეროვნული დაზვერვის დირექტორის განცხადებას. მაჭავარიანის თქმით, „დიფ სთეითზე“ პირველებმა საქართველოს ხელისუფლებამ დაიწყო საუბარი, რასაც დღეს აშშ-ის ადმინისტრაცია იმეორებს.

„რა თქმა უნდა, ველოდებოდით რაღაც ტიპის გზავნილებს ჩვენი მისამართით, რომელიც რატომღაც იგვიანებს. მით უმეტეს იმ პირობებში, რომ ჩვენ გაჟღერებული გვაქვს - პრემიერ-მინისტრიდან დაწყებული რიგით დეპუტატამდე დამთავრებული, რომ აბსოლუტური მზაობაა, გზამკვლევი დავწეროთ დროსა და სივრცეში - გაიწერება, თუ რა ნაბიჯებია გადასადგმელი, რომ ურთიერთობები აშშ-თან აღდგეს და რეალური პარტნიორობა დაიწყოს. ამის მიუხედავად, არის აბსოლუტური დუმილი. რა თქმა უნდა, ჩვენ ვრჩებით სტრატეგიული მოლოდინის რეჟიმში, თუმცა კითხვის ნიშნები არსებობს, ვინაიდან უკვე ძალიან დიდი ხანია, რაც ვერანაირი კონკრეტიკა ვერ გავიგეთ საქართველოსთან მიმართებაში“, - განაცხადა მაჭავარიანმა.

„დიფ სთეითი“ ამერიკის საფრთხედ რჩება - ამ განცხადებას ამერიკის შეერთებული შტატების ეროვნული დაზვერვის დირექტორი აკეთებს. ტულსი გაბარდი ამბობს, რომ „დიფ სთეითის“ წარმომადგენლებმა შტატების ინსტიტუტების და დაზვერვის პოლიტიზება მოახდინეს და სახელმწიფო სტრუქტურები მოქალაქეების წინააღმდეგ საკუთარ იარაღად აქციეს.